Shillong: U MLA warim ka West Shillong Constituency uwa man leh u Working President ka United Democratic Party (UDP), u Paul Lyngdoh ynne ka sngi da pynbna u wa daw yakhun u ya ka Election MDC 2019 na Jaiaw Constituency.
Ya kani ka rai da chim hadien ka yachem yong ka UDP Constituency Committee na Shillong West Constituency, kamjooh ka Jaiaw MDC Constituency kawa man ha ka tayaw wa da dep.
Hawa yaklam wa kiwa thoh khubor ynne ka sngi, u Paul da ong u wa ka District Council ka klam ko boon kiyi kiyi tangwa em ka thylli kawa heh bha ya iyi wa ong wa iyi wa leh ki.
“Ki kyndon wa ki Bill kiwa boon wa da mynjur da ka District Council sahkut noh ki kam ki thoh donhi ha ki kot, katwa i pynkrehkaam won ym em,” da ong u Paul hawa batai ya ki daw wa mih u cha kani ka Election.
“I da yoo i ya iwa jia barabor wa em i ya tyngkhooh hapyrdi ka District Council wa ka sorkar, i toh wow thooh ya ki laad wow krehlang waka sorkar, neibhah ka Council dei samen ym neh ko khlem ka sorkar jylla wei ka sorkar jylla daw tkut noh i yatoh ko waki paidbah lada ym burom ym kheiñkor ko ya i krehkaam ka District Council,” ong u Paul.
U Paul Lyngdoh uwa man u President warim ka Khasi Student Union (KSU) daw yakhun pyrchah u ya u General Secretary warim ka KSU, u Auguster Jyrwa na ka Congress wa ya u Thomas Passah uwa man u President warim ka KHNAM-SYW.
U Paul da ong u leh chwa wow chim ya kani ka rai wow yakhun ya ka Election MDC, da hap pyrkhat u ya kiwa boon ki phang kylli hei yatoh wa kani ka Election kamjooh ya ka Party kawa da lai cha khmat neibynta wow pynkhreh ya kani ka Elekshon, da pynsniaw u leh wa da em hi u i thmu na oo samen wow yaleh Election MDC.
Da pyntip u leh wa da em hadooh 10 ngut kiwa paan Ticket MDC na kani ka Constituency.
Discussion about this post