Shillong: Ki wakreh ka Meghalaya Energy Corporation Limited (MeECL) hapoh ka lama yong ka Coordination Committee of Registered MeECL (Employees) Associations and Unions da rai ki wow pynjoor yei yakhih lada ym yoh ya ka tulop hapoh ka 15 tarik uni u bnai.
U General Secretary yong ka CCORMAU, u Arju Dkhar da ong u wa ki wakreh ka MeECL da e por ki ya ka sorkar hadooh ynne ka sngi wow pynlait, tangwa ym ye wow leh kamwa da dawa, iwa da pynman ya ka Union wow e por biang hadooh ka 15 tarik, wei lada ka sorkar ym ye ko wow pynman kaam wei ym yoh tulop chwa ka 15 tarik uni u bnai, daw pynman yaka yakhih deiwa sangeh krehkaam nadooh katai ka sngi, wei ha ka 16 tarik daw bood da ka yakhih chong chah thngan wei ha ka 21 tarik daw pynman biang ya ka sangeh krehkaam.
Chooh chooh da ong wa lada ka sorkar ym bna ko hawa yatoh wa ka tulop yong ki wakreh, ha u Duiatra (Jan), 2021 daw mih paidbah wow lai toor cha Secretariat, katwa ha ka 18 tarik wa ha ka 22 tarik u Duiatra daw pyndooh bordiñ ha waroh kawi ka jylla.
Ha ka yalang kawa da man ynne ka sngi ha Lumjingshai, u Dkhar da beiñ u ya ka sorkar wei klam chrai ‘manda thngan i, ki khon yong i thngan ki’. Da ong u wa ka sorkar ym em hok ko wow dai yeiwa em ka jylla.
