Kiwa sikai SSA hapoh ka Meghalaya SSA School Association (MSSASA) ynne ka sngi da pynbna yakhih ki ha ka 21 tarik uni u bnai kawa man leh ka sngi lehkmen dap 50 snem ka jylla, deiwa chong kylleiñmyngngor wa i kdoh lama yong ha Khyndai Lad nadooh 12:00 waje i sngi hadooh 1:00 waje i sngi wei wow pynbood won da i thang mombati heipor 5:00 waje i janmiet.
U President ka MSSASA, u Aristotle Rymbai da ong u wa i pynbna ka seiñ wow pynmanyakhih toh kam chibynta yei wym mano ka sorkar jylla ya i dawa ka seiñ wow pynpsiah noh ya ki 12,451 ngut kiwa sikai SSA kam kiwa sikai skur sorkar.
Ha iwi i liang u Rymbai da ong u wa ha ka 4 tarik uni u bnai ka MSSASA da paan yutip ki da ka RTI na ka Department of School Education and Literacy ka Ministry of Education yong ka sorkar India khnang wow chem ya ki daw tre wa yatoh wa i wym su ka sorkar ya ka tulop wa da sahteiñ nadooh u Naichipaw 2021 hadooh u Duyatra (Jan) 2022.
Da ong u wa katkam ka jubab RTI wa da yoh da pynyoo che wa dadep pynlait ya ka poisa ka First Installment kawa T. 5934.92 lak neibynta ka Financial Year yong u snem 2021-2022 ha ka 9 Khonchonglad (Nov) 2021 wa T. 7351. 99 lak da pynlait biang ha ka 22 Kmaichonglad (Dec) 2021.
Chooh chooh da ong u wa katkam ka jubab da pyntip leh wa ka poisa wa da pynlait cha ka jylla Meghalaya wow kyrchaan hei wow su tulop cha kiwa sikai Elementary School man ko T. 20302.22 lak neibynta u snem 2021-2022.
U Rymbai da ong u leh wa katkam ka jubab da klam che ko wa ka Ministry of Education da kdaw che ko wa toh i kaamram ka sorkar jylla wow kitkhlieh ya kiwa sikai SSA neibynta wow tipmit ya ki kam kiwa sikai skur sorkar.
