U Montri Rangbah ka jylla, u Conrad K Sangma ynnin ka sngi da wai paidbah u ya ka Mawlyndep Community Centre waka 1st Biofloc Fish Tank ha Mawlyndep. Ya ka Community Hall da chna deiwa yoh poisa lang naka CM Special Development Fund.
U Conrad hawa e yei klam da ong u wa ka Mawlyndep Community Hall man ko kawi na kiwa phær dooh hapoh ka jylla wei daw man ko leh kam ka nongmuna ya kiwi ki thaw wow bood ki. Da yaroh u leh ya kiwa chong chnong ka jylla yei bien ki wow ya krehlang heiyatoh wa ki kaam imlang sahlang.
Da pynbna u leh T. 15 klur neibynta ki kaam uiñke suwari ha ki thaaiñ Mawlyndep kiwa daw pynkrehkaam deilang wa ka chnong.
Da pynbna u leh wa hapoh ka Meghalaya Integrated Transport Project (MITP), ya u sarok uwa na Mawmaram cha laad NEPA da pynchna hei dor wa T. 64 klur iwa daw yarap bha wow pynmiat ya ki thaw ha kani ka thaaiñ.
Ha kani ka yalang, u Montri Rangbah da e u leh ya ka (Open Defecation Free) Plus Certificate cha ka Dorbar Chnong kawa da ye wow pynneh yei biang ki paikhana ha ka chnong yow lait nei lai paikhana cha lait cha khloo deiwa pynbiang ya ki paikhana wei kamjooh deiwa lai chakhmat wow wanrah yei khooid i suba nadooh i rukom pynlang yei jhep ha ki yung ki sem iwa da chynna nei khooid ka chnong wa ki soodong sookun.
