Hadien wa mih biang i kynaad ha khappood ka Assam-Mizoram sa chisien heiwa waroh ar liang da pynbaad ki kawi ya kawi hadien wa em biang i yasiat hei step synyaaw ka 17 tarik heiwa da em leh wa mynsoo heiwa ka Mizoram da ong ko wa da em wa siat neiliang ka Assam katwa ka Assam won da ong ko wa em kiwa siat neiliang ka Mizoram najrong ki loom Darasing heipor wa da em ki wakreh wa chna sarok yow lai cha Bilaipur.
Neiliang u SP ka Hailakandi District, u Gaurav Upadhyay da ong u wa da em kiwa na Mizoram kiwa da pyrchang wow chong ha ki loom Darasing wei da siat ki ya ki pulit manda poi ki ha itai i thaw.
U SP da ong u wa ha i miet ka 16 hadooh i kylla tarik cha ka 17 tarik, ki pulit ka Assam wa em ha Dara Singh Hills BOP da yoo ki ye em ki bru wa wan wei hawa em wa wan heipor miet chapoh ka Reserve Forest da jooh kylli ki toh kiyi tangwa kini ki bru da sdang ki wow siat wei kam wow yada wei wow beh, da siat kylliang wei hadien ini da sangeh i yasiat.
Tangwa neiliang ka Mizoram da ong ko wa ki pulit ka Assam da siat ko ya ki bru paidbah. Heiyatoh wa ini, u DC ka Kolasib District, Mizoram da thoh u cha u DC ka Hailakandi wa ki le ngut kiwa chong chnong ka Vairengte Sub-Division u Lalchhandama, u Lalduhawmi wa u Vanlalrovi da chah khut ki ha u bru wa tip kam u Nibus uwa chong chnong ka Bilaipur yow yachem wa ki ha Aitlang Tlangpui yow chim yei doh wa jooh chim ki.
Hadien wa poi ki ha ini, da siaw u Nibus wei manda em wa siaw kylla, da pynman ya ki pulit Assam kiwa em ha itai i thaw wow siat ki heiwa da em kiwa mynsoo malu mala, da ong u SP ka Hailakandi.
Da ong u leh wa i long i man wa katni da man i iwa jai jai.
