Ka Dorbar Chnong Bataw, East Jaiñtia Hills District lyngba u waheh chnong yong ka da pynche ko yei pynbaad ka chnong Pynurkba heiyatoh wa i lai ka chnong Bataw wow pynsangeh ya ki bru wa choh moo kamjooh kiwa lai khih chapoh u pood u ang ka chnong Bataw.
Hajrong ini, ka chnong Bataw da beiñ joor ko yei pynbaad wa khlem yurim ka chnong Pynurkba iwa pynyoo la kai i kaam khynnah ke donhi, wa kynthup nadooh i pynbaad ko wa ki paidbah ka chnong Bataw da rah tiar pynmynsoo haroh ki ha ka 24 tarik uni u bnai wow pynthut ya ki bru kiwa na ka Pynurkba.
U waheh chnong da ong u yow krum ka chnong u rah ki tiar pynmynsoo hawa ym em ko iwon iwon i mut wa sih, tangwa lai ki cha ka thaw wa pyrtuid Lyngken Tariang ha ka 24 tarik uni u bnai dei thmu donhi u pynsangeh ya ki bru na ka chnong Pynurkba kiwa khih hei thaw ka chnong Bataw, wei wym jooh em leh i ya kajia chi kattu por wa jooh yaklam pynbait pood.
Da ong wa kani ka thaw wa lai pynsangeh ka chnong Bataw ha ka 24 tarik uni u bnai toh kawa haap hapoh u pood u ang ka chnong Bataw wa dadep Register hapoh ka yung krehkaam u Chief Forest Officer, JHADC, No.JHADC/FOR/94/83/(PT)B ha ka 4th December 2008, hapoh ka aiñ United Khasi Jaintia Hills Autonomous District Council (Management and Control of Forest) Act Rules 1960 yoh ka chnong Bataw ya ka Regular yong ka.
Katkam ka chithi No.JHADC/FOR/83/2020/665-67 Dated Jowai 11th March 2020 da e Copy pyntip cha ka chnong Bataw hajrong i Survey ya ka khloo Lum Pdak Pdak ha ka 17/03/2020.
Ka chnong Bataw da li mih ki ha katai ka sngi hei thaw wa da booh da ka ophis wei da chem wa u Surveyor da psiah u cha ka khloo ka chnong Bataw iwa pynyoo che wa ka chnong Pynurkba da kam ko wot yei bynta khloo chnong Bataw wei neiliang ka chnong Bataw da ujor ko yei paan Register ka chnong Pynurkba ya ka khloo Lum Pdak Pdak ha ka 18/03/2020.
Na i daw wym em i pynbait tæ da neh slem bha kani ka kaam wei hadooh ka 29/11/2022 neiliang ki ar chnong dapoi biang ki chei pynbait pood tangwa da kyntait noh da kiwa yahkhmat chnong Pynurkba kiwa dang chah jied thymme.
Hadien ini ka chnong Bataw da ujor ko wa em kiwa chong chnong ka Pynurkba wa da rep chapooh u pood u ang yong ka chnong Bataw, tæ neiliang ka chnong Bataw da yoh jubab ko na ka JHADC ha ka 22/08/2023 katkam ka chithi No.JHADC/FOR/97/83(Part-B)2463-69 Dated Jowai the 22nd August 2023 deiwa jubab wa ka chnong Pynurkba da em ko ya ka kot Register No.JHADC/FOR/97/83/PT-B)/541-44 Dated Jowai the 06th March 2020.
Hajrong ini ka chnong Bataw da pyrchah joor biang ko yeini, kamtæ ka JHADC da phah ko yeiwa thoh u CFO cha u Secretary ka Elaka Rymbai deiwa kdaw ya ka rai ka Executive Committee Decision No.6 Dated 18.01.2024 wei da pyntip wow em ka Joint Inspection ha ka 22/05/2024 heipor 10:00 waje i step hei emlang ki dkhot ka Boundary Committee yong ka Elaka Rymbai, tangwa sñiawsih won ki u yoo wa kani leh wym pu em leh ka ophis hadooh ynne ka sngi.
Ha ka 10th September 2024 da em biang ka yalang ha kamra krehkaam yong u CFO deiwa e laad ya ka chnong Bataw wa ka chnong Pynurkba wow pynbait du hapyrdi ki ar chnong heiyatoh wa ka kaam khloo “Synrang Walieh” wa ka “Lum Pdak Pdak” heiwa hadien wa da ya pynbait toh u pyntip cha ka Office u CFO.
Neiliang ka chnong Bataw da pynyoo ko yei chimkhia deiwa pyntip cha ka chnong Pynurkba ha ka 14/05/25 wow pynbait ya u pood u ang tangwa diaw won u yoo wa ka chnong Pynurkba wym e jubab ko yeini.
Dei sñiawkhia yeini da pynkymmoo biang ka chnong Bataw ya ka chnong Pynurkba ha ka 14/07/25 wow pynbait ya u pood u ang tangwa kamwa yooh tdong pseiñ khyrngiat ko u yoh yei jubab na ka chnong Pynurkba haka 18th July 2025 wym sñiaw emkaam de ki u pynbait pood wa ka chnong Bataw neibhah da em ki ya ka kot Register na ka ophis No.JHADC/FOR/97/83/PT-B)541-44 Dated Jowai The 06th March 2020 heiwa da Register lut ya ki thaw chnong Bataw waroh cha ka Pynurkba hei heh wa 733.8 Hectare.
Kamtæ ka chnong Bataw da dawa joor ko na u Chief Executive Member ka JHADC kamjooh na u Chief Forest Officer yong ka JHADC Jowai wow pyndooh pyndam chwa ya ka kot Register yong ka chnong Pynurkba kamwa da pyndam u Acting Daloi ya ka Recommendation yong oo hajrong ka yurim wa em wa chim kabu wow pynemkaam bakla wow pynyoh kot ya ka chnong Pynurkba khlem em i ya sñiawthooh yumut wa ka chnong Bataw da ka ophis u CFO cha ki thaw ka chnong Bataw khnang yow lait na iwon iwon i jia wym sñiawsuk, pynkut ka kyrwoh wa da phah da u Waheh Chnong ka Bataw, u Deihok Sumer.
Discussion about this post