Shillong: Hadien wa mih i chah thombor ki khynroo kiwa laike cha ka chnong Syntung ha i janmiet ka 8 tarik iwa da pynman leh ya u Macmilan Kharshandi wow dooh yei mynsien wa i mynsoo ki 8 ngut kiwi won, neiliang ka chnong Syntung da kyntait ko wa itai i jia toh iwa jia hapoh ka chnong.
Hawa klam ynne ka sngi wa ki laad pathai khubor, u sordar ka chnong Syntung, u Robert Pale da ong u wa kitai ki khynroo toh kiwa chah thombor ha ka chnong Pashang kawa jngai kamwa 10 km na Syntung, wei u Macmilan da khlaad u ha i thaw wa tip kam ka Lad Mawlang.
U Sordar da kyntait u leh yei emkti yong kiwa chong chnong Syntung wow thombor ya ki 9 ngut, deiwa ong wa ym tipmit u ya kiwon kiwon kiwa thombor ha katu ka sngi.
Neiliang kini kiwa kitkaam ka chnong Syntung, da ong ki wa hadooh katni ym tip ki kiwon wa emkti na kiwa chong chnong Syntung wei ym tipmit de ya kiwi leh kiwa emkti wow leh ya katai ka kaam bru khloo ha katai ka janmiet neibhah wa ki paidbah da wan poi ki da ki hajar ngut na ki chnong waphær waphær nadooh Jongksha, Mawkynrew, Mawsna, Pashang wa kiwi.
Ha iwi won i liang, kiwa synchaar chnong ka Syntung da beiñ joor ki ya ini i jia ha Pashang wa Lad Malang deiwa suba sih wei pynbaad chohnoh, deiwa pynsñiaw leh wa smat ki wow ya krehlang wa ki pulit wow yoh kem ya ki bru wa emkti ha katai ka kaam thombor.
Toh naka khubor hamsaya chah pynbaad chohnoh ki khynroo, ong u sordar Raid
Hawa pynche hajrong itai i jia, u Sordar ka Raid Lynshing, u Wanslempor Lynshing da pyntip u wa hawa kini ki bru kylli ki na ki khynnah khian ha Mawsna ya ka luti wow lai cha Shillong, ki khynnah da tieñ ki wei da lai pyntip ki cha ki waheh wei ini da pynman langknia pathan ya kini ki bru hadooh wa chah suba ki kam ki chohnoh, hawa kiwa boon da ksoh ki yaka kari yong kini ki bru ha katai ka chnong wei ka khubor da hær smat ko deiwa ya Phone ki bru.
Heini, ki paidbah da ya poi ki cha katai ka thaw wei da ksoh ki yaka kari hapyrdi i yada ki bru ha katai ka chnong Mawsna. U Wanslempor da ong u wa neibhah wa tieñ yei thmu yong ki paidbah wa hiar thma, kini ki bru da pyrchang ki wow yut noh na katai ka thaw da ka kari wei ka kari toh lumbub ko ya ki ar ngut ki khynnah wei heini da heh noh ini i jia.
Kam wow pynkynmoo wa haka sngi Bibar, uwi da khlaad noh, ar ngut mynsoo joor katwa ynru ngut kiwi won da toh kha ki hadien wa chah dat ki ha ki paidpah ha Pashang.
Ha ini i jia, u Macmilan Kharshandy da khlaad u, kiwa da mynsoo joor kiwa em ha Civil Hospital katni toh u Teiborlang Kharbangar wa u Ricky Dkhar wei kiwi kiwa da takha toh u Alfred Sohtun, u Vishal Deb Merma, u Bijay Singh, u Rohit Suting, u Banteilang Kharumnuid wa u Pappu Deka. Waroh kini toh kiwa naka chnong Madanrting, Shillong.
Discussion about this post