Heiyatoh wa mih khubor wa em ka manyung kawa hap leh Quarantine hapoh khloo ha South West Khasi Hills District, neiliang ka DC da phah ko wow pynman yaka takit heiyatoh wa ini wa jia yaka manyung kawa naka chnong Manad.
Katkam wa chem ka takit, ka khon ka Pristina Shylla wa u Borming Nongbsaw kawa 15 snem kawa naka chnong Manad, da liwan ko na Mawlai Nonglum, Shillong i thaw wa sah ko yow lai puræ. Da lai chwa ko ha kawi ka Hospital wa em ha Shillong yow leh yaka Medical Check-up ha uni u bnai haka 5 tarik wei da thmu noh ko wow liwan cha ka chnong ko. Kamtæ ka bei kani ka khynnah da pyntip ko cha u waheh chnong wa u Secretary chnong yow yoh bor ko wow liwan, wei da phah ya kani ka khynnah wow leh Quarantine chwa ko.
Kani ka khynnah da liwan chnong ko haka 7 tarik uni u bnai wei da neh ko ha yung hadooh ka 10 tarik uni u bnai. Ha i step ka 10 tarik neiliang u Myntri wa u Secretary da lai ki cha i yung ka Pristina yow tyrwa wow phah leh Quarantine ya kani ka khynnah ha iwi i yung trep wa em ha i thaw rep neidaw wa em boon kiwa sah hajan i yung, wei ini i yung trep em i kamwa 15 minit ha Mawtangdiar deiwa lai kjat na i yung wa em hapoh ka chnong Manad.
Ka Pristina hadien wa yaklam ko wa u kurim ko, da rai ki wa ini man i iwa biang wei iwa ye u leh heiwa heijooh i por ye ki wow pyndep yaka kaam rep wa thung saroo wa u murit ki wei ini i lai sah cha i thaw rep toh iwa jooh leh hi ki warep kani ka thaw. Kamtæ da pyllang ki ya iwa emkaam ki, wei deilang wa ki 5 ngut ki khon kiwa kynthup ya i khonboo wa dang 6 bnai da lai sah ki cha ini i yung trep tangwa ym em pyntip ki cha ki waheh chnong.
Haka 19 tarik neidaw wa emkaam baam wa i dawai ya i khonboo, da liwan biang ki cha ka chnong Manad, wei pyn ha kani ka janmiet da em ki khynroo wa wan wow yaklam wa ki deiwa riñ Video, heiwa ya ini i Video da pynpoor ha ki Social Media.
Neiliang u waheh chnong wa u Secretary chnong da ong ki wa ym em pynbor wow phah leh Quarantine ha i yung trep wei ym tip ki yeiwa lai sah ki cha ini i yung trep wei kamjooh yeiwa da liwan biang ki chapoh ka chnong. Da ong ki leh wa ym em chah kyntait kani ka manyung lane chah pait khmat ki wei da paan maap ki leh na kani ka manyung.
Neiliang ka Pristina da pdiang ko ya ini i paan maap deiwa ong leh wa ym em chah pynbor ko wei da leh ko ya iwa leh ko deiwa pyrkhat yei bha i miat ka chnong.
Neiliang ka khon leh da chem wa ka lai yaw hi ko wei ym em chah kyntait ko lane em iyi iyi jia wa phær.
