Neiliang ka Dorbar Chnong Nartiang da pynche ko hajrong ka khubor wa da mih heiyatoh waka yalang pynskem Unit ka NPP ha Nartiang wa da pynman ha i miet 7 tarik uni u bnai deiwa ong wa ini da pynman ha Nartiang, wym toh ha Nartiang Pohshnong, neibhah ka Nartiang em ko du kawi donhi ka chnong kawa da bna naam wei wa da tipmit waroh kawi ka pyrthai, wym em katæ ka pohchnong næ pohskur kamwa pynmih ka NPP ha ka khubor.
Ka Executive Committee ka chnong Nartiang kyrpaad joor ko ya kiwon kiwon kiwa pynmih pyrtuid Nartiang wa emkaam u thooh yutip bha ki deiwa bniah chwa u pynmih khubor. Ka EC chnong da maham joor ko la nang em kiwa pynmih bakla yei pyrtuid ka chnong Nartiang neini chakhmat daw pynchitom ya ki deiwa eh.
Heiyatoh wei pynskem ya ka NPP Nartiang Unit da ong wa ym ye u len wa man ko kawa chongchit hadooh kattæ kattæ kamwa mih khubor, heiwa i jied ya ki dkhot ka NPP Unit ym em u man ko kawa lai-bait lai-ryntih, em chiboon ki awri awra neidaw wa boon kiwa chong chnong wym ngait ki ya ki dkhot kiwa da jied ha katai ka miet kat hadooh wa u S. Dhar uwa man u kyrtong MLA ka NPP da hap u wow pynsangeh næ pynpep noh wow pynskem ya ki artylli ki Unit yong ka Women’s Wing waka Youth Wing neidaw wa mih i awri awra hapyrdi ki paidbah waboon walang ka chnong.
Heiyatoh wa ki dkhot ka NPP Nartiang Unit, da ong wa kiwa da chah jied ha katai ka miet boon kiwa da iehnoh ki yei kaam wa da thung ya ki neidaw wym sñiawsuk ki ya i ka rukom jied ya u President, wei da rai ki leh u yakrehlang ki ha i yahluti u Waheh Chnong katkam ka sur na u paidbah wa boon wa lang, wei wym yakrehlang ki waka Unit.
Heiyatoh won wow pynlai ya ka yalang wow jied ya ka Unit, neiliang ka chnong ym sñiawsuk ko u pynlai da ka Party næ ki bru na baar chnong kamtæ neini chakhmat la em kiwon kiwon ki yalang ki seiñ Party, ka chnong kyntu ko toh u pynlai da ki bor ka chnong khnang yow lait na ki awri awra hapoh ka chnong ka thaw.
Kani toh katkam ka Wyrta na u Waheh Chnong wa u Secretary ka Dorbar Chnong Nartiang.
Puræ leh: Chongchit ka yalang pynskem Unit u Sniawbhalang Dhar ha Nartiang Pohshnong
