Ka Dorbar Shnong Ialong, West Jaintia Hills da pynbna paidbah biang ko sa chisien heiyatoh wa i khooid i jngiar i chongsuk chongsaiñ hapoh ka chnong ka thaw, wot hadien wada pynbna cha ki paidbah heiyatoh wa i kyrpaad ya waroh ki khon yong ka chnong kamjooh ya ki para marjan chnong heiyatoh wa i khang pyrchah ya ki paidbah wow chong miet, noh Plastic wei noh khiar yei jhep ha tymbood u NH06 wa haap hapoh u pood u ang yong ka chnong iwa mut nadooh Soomer, Lum Bihsyntu, Lad Sabahmuswang, Lum Ladaw, Madan Latein hadooh wa poi Ialong Toll Plaza wa Rajasthan Hotel iwa pynsih dur ya ka chnong ka thaw kawa man kawi na ki thaw uiñke suwari namo ka Tourist Spot wa bna naam yong ka Ri-loom Jaiñtia.
Ka Dorbar Chnong Ialong da pynbna ko leh yei khang pyrchah yei pynemkaam ya ki Plastic wa pynemkaam du chisien donhi (Single Use Plastic) kam chibynta wow ya krehlang wa ki bor District, ka sorkar jylla waka sorkar pyrdi.
Lada chem ya kiwa leh pyrchah hapoh kini ki thaw wada kdaw haneiñ, ka Dorbar Chnong Ialong daw pynchitom ko ya ki katkam ka aiñ chnong deilang wa ka kuna.
Ha kini ki thaw wada kdaw haneiñ wym em kiwi tawon ki chnong wa ye u tkular ya ki kaam chnong yong ka Dorbar Chnong Ialong.
Ka Dorbar Chnong Ialong da pynche ko leh ya ka chnong Sabahmuswang wym ye ko u chim ya kiwon kiwon ki kyndon aiñ chnong yong ka ha kti deiwa beh ya kiwa dai baam ha ki dukan næ ha ki kari kam kiwa dai jhoor wa kiwi ki marbaam kiwa da tipmit da ka Dorbar Chnong Ialong lyngba ki NOC wa biang ki yong ki.
Ka Dorbar Chnong Ialong da beiñ joor ko ya ka chnong Sabahmuswang yeini i rukom leh yong ki deiwa chim ya ka aiñ ha kti wow beh ya ki bru na ki thaw kamai jakpoh ki yong ki.
“Hao ye u pdiang wa ka chnong Sabahmuswang toh ka chnong wa dang lung wym pu em u slem i wan seiñ chnong yong ka hapoh ki thaw wa sylli da ka chnong Ialong, ye leh u pdiang wa ka Sabahmuswang smat ko leh u kreh ya ki kaam wa bha neibynta i chongsuk chongsaiñ ha kini ki bynta wada kdaw deiwa pyrchah ya kiwa noh roi yei jhep lane ki Plastic, ki klong bilor kamjooh kiwa chong miet hapoh ki kari yong ki palat yei por, tangwa ym ye won ko wow ong næ kam wa toh u pood u ang u yong ki neibhah kat hadooh ynne ka sngi wym pu em u poi i ya sñiawthooh hajrong ki bynta kiwa ka chnong Ialong da e bor ko ya ka chnong Sabahmuswang wow pait u sylli ko da ka ha kini ki thaw wada kdaw (Soomer, Lumbih Syntu, Lad Sabahmuswang, Lum Ladaw, Madan Latein) neibhah ya kini ki thaw dang haap ki hapoh i pait i sylli yong ka Dorbar Chnong Ialong. Heiwa kat hadooh ynne ka sngi ka Dorbar Chnong Ialong dang pait dang sylli hi ko ya kini ki thaw,” pynkut ka wyrta na ka Dorbar Chnong Ialong.
