Ka Dorbar Chnong Ialong, lyngba u Waheh Chnong da pynche paidbah u yei mih pyrtuid ka chnong ha ki ar tylli ki chah kem drug kiwa da jia ha kini ki ar sngi.
Heiyatoh wa i kem ya kiwa khayi drug ynne ha East Jaintia Hills District ha Umtyra, neiliang ka chnong Ialong da beiñ joor ko yei kam chnong uwi na kiwa chah kem uwa tip u Heirtami Dkhar wa oo toh u tre chnong ka Ialong, tangwa ka chnong da beiñ joor ko yeini neibhah uni u bru ym tipmit ka chnong oo wei ym toh leh uwa chong chnong ka Ialong.
Ka Dorbar Chnong Ialong da pynche ko deiwa tikna wym em ki jait kur Dkhar hapoh ka chnong wei lada uni u Heirtami Dkhar toh uwa wan chongkha chongman itæ leh wym ye u pdiang wei da pait leh yei pyrtuid kiwa chong chnong heiwa ym chem yei pyrtuid u.
Da ong leh wa lada u Heirtami Dkhar kam u wa toh uwa wan chongwai ha Ialong, yeini leh ym ye u pdiang neibhah ym em i pytruid u katkam ka aiñ chongwai namo ka Tenancy Act 2021 wa pynkrehkaam ka Dorbar Chnong Ialong.
Kamtæ da ong wa ini waroh pynoo ko wa uni u bru kwah u wow pynbood naam ya ka Dorbar Chnong Ialong wei da chim kabu u leh yei pyrtuid ka chnong.
Heiyatoh won wa i kem drug iwa da jia ha ka 5 tarik uni u bnai heipor kamwa 3:00 waje i sngi da ki pulit yong ka West Jaiñtia Hills heiwa da yoh wow kem ya ki 3 ngut kiwa dai drok deilang wa i drug waka Pistol wa kiwi de. Ka Dorbar Chnong Ialong da pynche ko wa kini ki 3 ngut ym toh ki tre chnong wei da yut ki cha Ialong na u sarok NH06 yow rieh yow lait na ki pulit tangwa da yoh wow kem ki na Ialong Park.
Ka Dorbar Chnong Ialong da pynche paitbah ko wa hadooh ynne ka sngi dang pteiñ bait i ya krehlang wa ki bor yong ka aiñ neibynta wow khang yei psiah i drug chapoh ka chnong.
Ka wyrta na u T. Ram Phawa, Waheh Chnong Ialong.
