Hadien wa da e FIR ka seiñ HITO ha u SP ka East Jaiñtia Hills District pyrchah ya u Sevenborn Tang deiwa pynbaad wa pynkrehkaam u ya ki Forest Check Point ka JHADC pyrchah ya ka aiñ deiwa pynchong yurim yeiwa jubab RTI ka JHADC.
Neiliang ka Secretary ka JHADC da pynche ko wa ka HITO da booh RTI ko ha ka 21-05-25 yow kylli chaphang i thung Agent ka Council yow pynkrehkaam ya ka Weightbridge cum Forest Check Point wa em ha Sunapur, East Jaintia Hills District, heiwa da jubab ka JHADC wym em pynkrehkaam ko ya kawon kawon ka Weightbridge hapoh u pood u ang ko wei ym em leh kam kattæ ka Forest Revenue Station kawa da kheiñ kam ka Weightbridge cum Forest Check Point, kamtæ ym em Agent wa da thung da ka JHADC yow pynkrehkaam ya katæ ka Weightbridge cum Forest Check Point.
Da pynche leh wa ka JHADC em hi ko kattu katni ki Forest Revenue Station wa da booh katkam ka Rule 56 ka United Khasi & Jaintia Hills Autonomous District (Management and Control of Forest) Rules, 1960 kiwa da pynkrehkaam nadooh wa sdang.
Tangwa hadien wa ka Council da chem ko wa neidaw i yoh dan na kini ki Forest Revenue Station toh iwa duna bha hadooh wym ye u su tang ya ka tulop kiwa kreh ha kini ki Forest Revenue Station. Kamtæ ka Council da sñiaw ko wa da emkaam wow e noh wow pynlai ya kini ki Forest Revenue Station cha ki bru samen yow pynku ya ka dan wa ye u khrong na kini ki Station.
Yow leh yeini da pynkrehkaam da ka Section 12 ka United Khasi & Jaintia Hills Autonomous District (Management and Control of Forest) Act, 1958, heiwa waroh i pynkrehkaam ya kini ki Forest Check Station (Revenue Station) da e kti noh cha ki bru samen deiwa khut yaleh Tender heiwa u Sevenborn Tang da jop u wei da thung ya oo kam u Agent ka Council yow pynkrehkaam ya ki Forest Revenue Station neibynta ka le snem.
Chooh chooh da ong wa u Sevenborn kam u Agent da leh u yei kaam u deiwa biang wei da wan su ya kawa toh u su kamwa da ya pynbait (Quarterly) cha ka Council. Wei da chem leh wa hapoh i pynlai u da ku bha ka dan wa da yoh hawa nujor ha ki snem mang tangka wa da lai iwa da yarap leh wow pynku ya ka yarong poisa ka Council (Forest Revenue System).
Hajrong ini da ong wa i pynbaad ka HITO toh kiwa yahbakla wei iwa bakla neibhah da leh yeini khlem da pyntikna, khlem da kylli bniah wei khlem da tip tikna yei long i man iwa ye wow yah chei sñiawthooh bakla ki paidbah iwa daw ktah leh yei naam i burom ka JHADC.
Da klam che leh katkam wa da kylli ka HITO ha ka RTI da kylli ki yei thung Agent yow pynlai ya ka Weightbridge cum Forest Check Point ha Sunapur heiwa da jubab wym em pynkrehkaam ya kawon kawon ka Weighbridge wei ym em leh ka Forest Revenue Station kawa da tip kam ka Weightbridge cum Forest Check Point kamtæ ym em thung Agent yow pynkrehkaam ya kam katæ.Tangwa da phylla won kammon ka HITO da sñiawthooh ko dei yong ka hi yeini wa da jubab ha ka RTI deiwa pynbaad wa u Sevenborn Tang ymtoh uwa chim-wai næ u Agent ka Council yow pynkrehkaam ya kini ki Forest Revenue Station.
Kamtæ da pynche wa u Sevenborn Tang toh u Agent wa da thung da ka JHADC yow pynkrehkaam ya waroh ki Forest Revenue Station ka Jaintia Hills Autonomous District Council.
Discussion about this post