Ka Kur Phawa Siangshai lyngba u President yong ka, u H. Phawa wa u Charles C Phawa, General Secretary ynne ka sngi hadien ka yalang ka Executive Committee yong ka kur, da pynche ki hajrong i chah pynbaad wa emktilang ki heh ka kur u phah mih yaka manyung wa suba em taro ha chnong Saba.
U President ka kur u H. Phawa da khana u wa haka 15 tarik oo da lai hiar u ha chnong Saba wa da em ka yalang wa da pynbait u lai e yarap ya ki kur wa sah khonswet ha katai ka chnong neidaw wa khlaad ka bei u pa.
Tangwa da tne ryngkat u yoh yutip u waka manyung wa suba em taro da chah pakhot moo ko nadooh ka 14 tarik. Kamtæ manda poi u ha katæ ka yung wa suba em taro chem u wa da boon bha ki bru ha yung yong ka, tangwa wymtoh ka dorbar chnong.
Kamtæ oo leh da khut yaklam u wa u waheh chnong heiyatoh wa kani ka kaam wym hoi u mih i choh i chah dat, deiwa kyntu leh u khang yaki paidbah wym hoi u leh iyi iyi.
Tangwa heipor wa yaklam khana u wa neiliang u waheh chnong jubab u wym ye u wow bahkhlieh heiyatoh wa kani ka yung wei neitæ i daw toh u mih noh ki ya jia iyi re iyi ya ki.
Kamtæ hajrong ini, u H. Phawa ong u wa i ong u waheh chnong Saba wa ki waheh ka kur waka chnong emkti lang ki u phah mih yaka manyung wa suba em taro toh iwa bakla neibhah wym em ka rai kam katæ.
Heijooh i por ka kur da beiñ joor haroh ko ya kiwa emkti u tympiah tympra wei thang yaka yung ka Nijanduh Phawa.
Kamwa kani da man ka kaam kawa lait, kyntu haroh u ya kiwi kiwi ki bor wa toh u pait wow chimkhia ki u pynsmat neibhah kani pynyoo wa ki bru wym sñiawthooh ki yaka aiñ.
