Ka Kyrmen Foundation hadien wa mih ki khubor ha kini ki sngi chaphang u Phermeki Salahe ka wym em pynyoo ya ka Foundation ha i rukom wa miat. Heiwa ka khubor toh kawa da pynbaad ym du ya ki dkhot ka Foundation tangwa leh kamjooh ya u MLA yong ka Khliehriat Constituency, u Kyrmen Shylla. Da em boon kiwa da kylli ha ki Social Media kiwa da kwah u tip yei sakhiat i rukom krehkaam ka Kyrmen Foundation. Na ini i daw kam ka Foundation da kwah ki wow pynlait ya kani ka batai pynche chaphang ini i jia.
Da yoh yutip chaphang u Phermeki Salahe uwa man u khynnah yalehke siat khnam uwa na ka chnong Dkhiah West, East Jaiñtia Hills. Kamtæ da pyrchang wow kynjoh ktien yow phah wan yachem ya oo.
Da yachem wa u Phermeki Salahe ha ka 9 tarik u Naitung (Apr), 2022 ha ka yung krehkaam ka Foundation wa em ha Lad Rymbai. Neiliang ki dkhot ka Foundation da ap ki yei jynjar wa da chem u wei da khana u wa da thmu wow iehnoh chwa chipor ya kani ka yalehke neibhah wym em u ya ki tiar yalehke. Neiliang ka Secretary ka Foundation, ka Simi Khongthiang da khana ko wa neiliang yong ka Kyrmen Foundation da rai wow e yarap khnang yow ye u lai chakhmat ha ka yalehke yong oo. Da khana ko leh wa da pyntip chwa cha kiwa hayung hasem u ya ini i tyrwa yong ka Kyrmen Foundation. Hadien ini da rai wow lai chakhmat wow pdiang yei yarap.
Kamtæ ha ka 16 tarik yong u Naitung (Apr), 2022, u Phermeki da yachem u wa u President ka Foundation, wei heini u President da e ktien u ya ka Foundation wow yarap deiwa e da ki tiar yalehke, ka poisa wa T. 5000 man-u-bnai neibynta 3 snem, ka Scooty wow pynsuk yei lai i wan yong oo wei kamjooh leh ya ka madan yow pynpliah yei sap yong oo. U Phermeki da pdiang u yeini wei wow soi soskular (Agreement) kawa toh u leh hadien wa wan u President na Bengaluru wa dang hap lai phah sumaar ya kawa hayung u.
Ha u 5 tarik uni u Naisan hadien wa ka Foundation da tip ko chaphang ka yalehke yong u Phermeki ha Meghalaya Games, ki dkhot da yaklam ki chaphang wow booh (Post) ha Social media. Da phah leh ya kani ka Post cha u Phermeki neibynta i mynjur u wei da mynjur u yeini wow booh ha Facebook.
Hadien ini ha ka 8 tarik uni hi u bnai, ka Foundation da yoh yutip ko wa u payu u Phermeki da kwah u wow yachem wa ki dkhot chaphang kani ka Facebook Post. Neidaw wa da em i thut hajrong ini waroh, da Record yei yaklam hapyrdi yong oo waka Simi. Ha kani ka yachem, waroh arliang da mynjur wow pynche chaphang kane wa da pynmih ha Facebook. Tangwa ha ka sngi wa bood u Phermeki da ong u ya Foundation wow pyndam (Delete) ya kani ka Post heithaw wow pynche chaphang ini. Kamtæ ha ka 9 tarik uni u bnai da pyndam ya waroh ki Post wa yatoh wa ini. Ka Foundation da klam ko ya u Phermeki hi nadooh nyngkong kamtæ da ap yei kwah yong oo wei da leh yeiwa wa da ong u.
Hadien ini da yoh yutip wa u payu u Phermeki da e FIR u pyrchah ya ka Foundation hawa yatoh wa kani ka Facebook Post ha ka 12 tarik uni u bnai wei da chah khut ki dkhot ka Foundation cha Police Station ha ka 13 tarik wei ha ini i yachem da rai wa ki dkhot ka Foundation wow yachem wa u Phermeki markhmat ha ka 16 tarik ha Police Station. Tangwa ha ka sngi chwa i yachem itæ ka 15 tarik, da mih ka khubor wa ka Video yei kyntait u Phermeki yei yoh yarap naka Kyrmen Foundation.
Kamtæ ka Foundation da ong ko wa ini waroh wa da pynmih haneiñ toh ki yong sakhiat wei ka Foundation ka em ko leh ya ki sabut wow kyrchaan ya ini wa da ong.
Neiliang yong ka Foundation kwah ki wow paan maap na u Phermeki Salahe wa kiwa hayung hasem yong oo na i bynta iwon iwon i bakla wa i sñiawsih wa da yoh ki naka Foundation. Tangwa ka Foundation da yoo ko yei biang u Phermeki ha ka yalehke yong oo wei kamtæ da kwah ki wow yarap yow ye u wow yaleh hadooh wa poi cha ka thong yong oo. I thmu yong ka Facebook Post ym toh wow pyndooh burom ya u Phermeki tangwa wow e mynsien ya kiwi leh kiwa yalehke wow wan chakhmat.
Kam ka Foundation i thong yong ki toh wow yarap wei wow e kyrchaan ya kitu kiwa emkaam ya ka. Ka Foundation da rai ko wow kyrchaan ya u Phermeki Salahe wei katni leh dang yieñ leh hei jooh ka yurim wa smat wow yarap ya oo kamwa da kular wow leh.
