Ka Meghalaya Energy Corporation Limited (MeECL) hadien wa rai ko wow sdang pyndooh bordiñ (Load Shedding) biang ha waroh kawi ka jylla, ynne ka sngi da pynche ko wa i daw wa leh yeini toh wa dang sah sa T. 74.65 klur wow su ko cha ka Power Grid Corporation of India Ltd. (PGCIL) ka bai pynpoi bordiñ (transmission charges) ya kawa ka MeECL ympu ye ko wow su katni neidaw wa duna ware ka poisa ka Corporation.
Ka MeECL da ong ko leh wa katkam wa man katni ymye ki wot wow su ya ka tulop cha kiwa kreh yong ka wei ini wadep da paan yarap poisa na ka sorkar jylla T. 113.47 Klur wow yarap su ya ka bai pynpoi bordiñ cha ka PGCIL wa kiwi ki kaam kiwa dang yaklam hadooh katni.
Neidaw wym ye u su ya kani ka bai pynpoi bordiñ, ka PGCIL da rai ko wow pynduna i pynpoi bordiñ du kamwa 70MW donhi wei katkam wa man hadooh ynnin i yaklam dang lai bait i tangwa ka PGCIL kwah ko i kular wow su chwa 50% na ka bai pynpoi bordiñ wa dang sah hapoh chi tayaw wei wow booh i por wa skem heiwa kammon wow su pyndep ya kawa sah.
Katwa kamtæ ka MeECL dei wym yohsa da haap sdang biang ko u pyndooh bordiñ nadooh ynne i step synyaaw ka 14 tarik deiwa kyntu ya ki paidbah wow yaichah ki katwa i yaklam dang lai i chaphrang.
