Ka NEEPCO haka kyrwoh wa da phah ko da pynche ko cha ki paidbah ka Meghalaya hajrong i wym yohsa ko wow pynduna bordiñ wa e cha ka MePDCL deiwa leh katkam ki kyndon ka Central Electricity Regulatory Commission (Regulation of Power Supply) Regulations, 2010 heiwa da sdang ya ini nadooh ka 20 tarik uni u bnai.
Ka kyrwoh da ong ko wa neidaw wa boon palat wa sah ka bai bordiñ wa kynthup ya ka Late Payment Surcharge wa hap su ka MePDCL cha ka NEEPCO iwa man kam chibynta wa thied bordiñ iwa da poi cha ka T. 369.26 klur iwa da ktah leh yaka NEEPCO wow pyndap pynbiang ko yeiwa emkaam ko ha ki Power Station wei wow thied leh yeiwa emkaam ki Thermal Station yong ka hadooh wa ka leh da hap ko wow chim ram yow ye u pyndap yeiwa emkaam yong ka iwa da pyndap ram kylla ya ka leh.
Da pyntip leh wa ka sorkar India da yarap poisa ko hapoh ka Atmanirbhar Bharat Abhiyan yow yoh poisa kiwa saam bordiñ wow pynkhooid yaka ram wa sah ki. Hapoh kani ka Scheme, ka REC Limited waka Power Finance Corporation Limited da e ram ki T. 1345.72 klur cha ka MePDCL yow su lut ko yaka ram yong ka. Wei lada yoh ya kani ka ram daw yarap ko leh yaka MePDCL wow lait ko wow su T. 100 klur neidaw wa da pynduna yei dor ka Late Payment Surcharge wa hap u su cha ka NEEPCO.
Da pyntip leh wa ka MePDCL da dep ko wow su T. 352.98 klur cha ka NEEPCO lyngba kani ka ram ha ki ar bynta (Instalment) iwa da su ha u Duyatra (Jan) wa u Thohlakhmi (Feb) uni u snem. Tangwa hadien ini ym em de su cha ka NEEPCO sa kawa dang sah kawa T. 369.26 klur iwa da wanrah leh yei chitom poisa ka NEEPCO.
Kamtæ da ong wa hadien wa da leh waroh ki laad wow pynbor yaka MePDCL wow su yaka bai bordiñ wa dang sah iwa ym em leh ko, kamtæ ym yohsa ko wow pynduna yei pynpoi bordiñ cha ka Meghalaya.
Kam wow pynkynmoo wa u Montri Rangbah ka jylla u Conrad Sangma hadien wa kut ka dorbar mang tyngka da pyntip u wa i daw wa slem wow su yaka bai bordiñ toh neidaw wa ka poisa wa sah wa toh u yoh naka Atmanirbhar Bharat Abhiyan slem ko wow poi kawa man palat T. 360 klur.
