Ka Sohra District Demand Forum (SDDF) ha ka wyrta wa da phah, da pynsñiaw ko yei sñiawdiaw wa khroo hajrong i pynslem ka sorkar MDA hapoh i yahkhmat u Montri Rangbah, u Conrad K. Sangma wow pynbna (Notify) yei pynku kyrdan ya ka Sohra Civil Sub-Division cha ka District wa pura.
Ka SDDF da dep yachem ko ya u Montri Rangbah ha ka 26 tarik u Naichiphaw (October), 2022 heiwa da kular wow pait bniah ya ini i dawa yong ki paidbah ka thaaiñ Sohra waroh kawi.
Ha ka tayaw kawa nyngkong yong uni u bnai, u Montri Rangbah da dep phah u ya ka khubor lyngba u dkhot ka SDDF, u Alan West Kharkongor wa kwah u wow yachem wa ki dkhot ka Forum ha ka 5 tarik uni hi u bnai yow pynbna ya ka Sohra Civil Sub-Division kam ka District wa pura.
Ka Forum dei kmen wut-wut da lumlang ko ya ki khlieh synchaar wa ki waheh chnong yong ka thaaiñ wow pyntip ya kani ka khubor wa kmen.
Tangwa ka yachem kawa da man ha ka 5 tarik ha Sohra Circuit House, u Montri Rangbah da pynsñiawsih u ya ki dkhot ka Forum wa ya ki khlieh synchaar deiwa kular wow e ya ka District wei ka Sohra toh u man ko kam ka Headquarter. Wei mynnu u mankaam ym em jubab wei ym em klam tikna.
Ka SDDF da ong ko wa ini i kular u Montri Rangbah ha ka yalang ym yahaap de katkam i phah khubor yong oo cha ka Forum wow pynbna District noh ya ka Sohra Civil Sub-Division. Da man pathan ko du i kular boi wa ye u man wa da jan ka Election MLA.
Neidaw wa da em ki khubor hamsaya kiwa yah bakla, kamtæ ka SDDF da pynsñiaw che ko kdar lyngba kani ka khubor wa hadooh katni ka Sohra Civil Sub-Division ym pu em ku kyrdan District ko.
Kamtæ ka SDDF da ong ko wa u pteiñ ko ya ini i dawa hadooh wow mankaam wei da kyntu leh ya ki seiñ saiñhima wym toh u yahbakla ya u paidbah ka thaaiñ Sohra hajrong ini i kaam du wow yoh myntoi Election.
Ka kyrwoh na u Atiar Syiemlieh, Chairman ka Sohra District Demand Forum (SDDF).
Puræ leh: U e hi ya ka Sohra District ong u Conrad tangwa hap yang, jaaw slew kiwa da yooluti
