Ka yalang hapyrdi ka sorkar wa kiwa mihkhmat ka Harijan Panchayat Committee (HPC) ynne ka sngi ym pu ye u chim ya ka rai wa khaddooh hawa yatoh wa i kyrriah ya ki bru kiwa sah ha Them Metor, Them Ïewmawlong, wei kani ka yalang da pynman hadien wa phah ka High Court ka Meghalaya wow pynbait smat hawa yatoh wa ini i kaam.
Hawa klam cha ki laad pathai khubor, u Symbood Montri Rangbah, u Prestone Tynsong uwa man leh u Chairman ka High Level Committee kawa da thung yow pynkyrriah ya ki bru na Them Metor, da ong u wa ka yalang toh kawa mihsoh, wei pyntip u leh wa da klam che cha ka HPC wa hap bait wow pynkyrriah ya ki bru na katai ka thaw kamwa da e yumut da ka High Level Committee.
Da pyntip wa ka sorkar da jied ko ya ki kattu katni tylli ki thaw, wei kiwa yahkhmat ka HPC daw lai ki wow pyntip ya ka rai cha kiwa chong chnong wa daw em biang ka yachem ha ka 25 tarik uni u bnai, wei ye wa hadien katai ka yalang daw ye wow khana ya ka rai wa khaddooh, wei neiliang ka sorkar dang yang ko leh ya ka bui (Report) na ka Shillong Municipal Board wa na ka chnat Pynroi Sor, wei hadien ini daw ye u pyntip yei thaw wa da jied yow kyrriah.
Hawa kylli, u Prestone da pyntip wa em hadooh 342 tylli ki manyung ha katai ka thaw, wei na kini waroh toh ki wakreh hapoh ki chnat sorkar hanla ym em de kreh ki katni tangwa kiwa nachwa toh ki wakreh ha ki chnat sorkar.
Neiliang u Chairman ka Harijan Panchayat Committee (HPC) u Gurjeet Singh da ong u wa ka rai daw chong ha ki paidbah, lada mynjur ki wow kyrriah katkam wa phah ka sorkar, neibhah ya iyi wa da yaklam ynne ka sngi, ka HPC daw lai ko wow pynsñiaw chwa cha kiwa chong chnong katai ka thaw.
Da pyntip u wa katkam i yaklam wa ka sorkar da mynjur wow kyrriah ya ki 342 tylli ki manyung cha ka thaw yong ka European Ward.
