Ka Department of Sports and Youth Affairs da e wyrta ko heiyatoh waka Cash Award Scheme for Sportspersons 2022, kawa man ka laad pynchlur ya kiwa yaleh Sports kamjooh ki Coach kiwa da pynyoo yei sap yong ki ha jar jiar ki jait yalehke, heiwa da em 3500 ngut kiwa yalehke kamjooh ki Coach kiwa da yoh palat Rs. 6 klur ha awjan dap 30 tylli ki jait yalehke.
Heiyatoh won wa em i artatien da ki kattu katni, neiliang ka Directorate of Sports and Youth Affairs da pyntip ko wa da chimkhia ko ya waroh kitu kiwa yaleh wei kiwa emhok wow yoh ya kani ka Scheme wei daw pteiñ wow man iwa pynmyntoi ya ki.
Da pynche leh wa i pynsakhiat ya waroh kiwa yaleh ya kani ka Scheme dang pteiñ i neidaw wa boon kiwa yaleh ya kani ka Scheme. Nadooh u Thohlakhmi (Feb) 2024, da dep saam ya ka 1300 tylli ki song poisa kawa dapoi Rs. 2 klur wei iwa khaddooh wa saam ya kani toh ha ka 14 tarik u Wisu (Mar), 2024. Wei kam ini daw pynbna chooh chooh ha ki bnai wow wan hadien wa pynsakhiat ya waroh kiwa toh yoh u yoh ya kani ka Scheme wei daw pynkup burom ki leh.
Kani ka Cash Award Scheme toh neibynta kiwa yalehke (Athletes) wa ki Coach ka Meghalaya kiwa da dep yoh takma ha ki lympung yalehke ha ki kyrdan State, Regional, National wa International. Wei ya ki kyndon kani ka Scheme ye wow pait ha ka Directorate of Sports and Youth Affairs, wei toh kawa da pynbna leh hapoh ka Gazetted Post.
Kawi na ka Cash Award toh kawa su chisien su iwa hadooh Rs. 75 lak ya kiwa yoh takma ksiar ha ka Olympics. Wei kiwi de ki rukom su toh deiwa kheiñ yei yoh takma ha ki yalehke Senior, Junior wa Sub-Junior katkam ka State Cash Award Policy kamjooh leh hapoh ka Ministry of Youth Affairs and Sports.
Najrong kani ka Cash Awards Scheme, da em leh ka Sports Scholarship Scheme kam kawi ka laad pynchlur ya kiwa yalehke ka Meghalaya. Hapoh kani, da e yaka Scholarship kawa chi snem kawa dapoi hadooh Rs. 60,000 chi snem (Rs. 5000 chi bnai). Wei hapoh kani da em palat 350 ngut kiwa yalehke kiwa da yoh Scholarship neibynta u snem 2024-25.
Chooh chooh dang khut leh ya kiwi kiwa yalehke wow wan e Application cha ka Directorate of Sports and Youth Affairs lyngba jar jiar ki Sports Association yow yoh Training, bai lai wa ki kyrchaan wa boon jait.
Ka chnat da pynchlur ko leh wow puræ bniah ya kini ki kyndon wei wow wan chakhmat lada em i wym sñiawthooh yow ye u pynbait pynsmat u pyndep yei kaam wei wow pynlait poisa.
Discussion about this post