Ka Montri wa pait ya ka chnat Information & Public Relation, ka Dr. M. Ampareen Lyngdoh, ynnin ka sngi da yachem ko wa ki heh ka chnat Art and Culture, Information and Public Relations wa Tourism yow yaklam yei jied ya u Commander Shangpliang wa u Nicholas Lemtor Kharkongor yow lai embynta ki ha ka tamasa wa tip kam ka Cannes Film Festival.
Ki shahep kini ki le tylli ki chnat da pyntip ki wa hadien wa da bichaar yei pyrtuid kiwa da tyrwa wa kynthup ya u Pradip Kurbah wa u Dominic Sangma heiwa u Dominic Sangma ye u wow chah jied wei yei pyrtuid u ye wow phah cha ka Ministry of Information and Broadcasting yow lai embynta ha ka Cannes Film Festival neidaw wa u Nicholas Lemtor Kharkongor ye u wow dam u lai.
Da rai leh wa neini chakhmat yow lai chimbynta ha ki International lane National Film Festival wa kiwi kam kini ki tamasa toh u em noh da ka Selection Committee ka wow khlieh da u Chief Secretary ka sorkar Meghalaya wei kiwa chah jied toh u pait da ki kaam wa da leh ki deiwa chimbynta lang u yaklam da ki bru kini ki le chnat wei deiwa ya mynjur lang.
Da pyntip leh wa kini ki chnat ka sorkar jylla da dep ki wow thoh cha kiwa pynman ya kani ka Film Festival yow tyrwa yei pyrtuid ki wow mihkhmat ya ka jylla tangwa yei rai wa khaddooh da chim da ka Information and Broadcasting Ministry ka sorkar India wei man ki kiwa laitlooid wow leh yeini.
Heijooh i por da ong leh wa ka chnat IPR da chimkhia ko ya ini i kaam yow leh noh da ka heithaw ka Information and Broadcasting Ministry ka sorkar India katkam ki kyndon wa da em chwa.
