Ka Synjuk Waheh Shnong Ri Jaiñtia (SWSRJ) lyngba u President yong ka u A. Lipon da pynche u yei pynmih khubor ki MDC ka BJP ha JHADC heiyatoh waki ID wa chna daka synjuk neibynta ki waheh chnong.
U Lipon da ong u wa kini ka ID toh deiwa bood yaka hukum wa pynmih da u Chief Secretary ka jylla ha kini ki por wa wa em ka khlam COVID-19 kawa hap u soi lang da u DC yow ye ki waheh chnong u leh yei kaam yong ki khlem da chah pynthut chah pynsangeh.
Da ong u leh wa u DC ym em lai lait u yaka JHADC wei da bood u yaka hukum ka sorkar jylla. Chooh chooh da ong u leh wa kini ki ID wa da e cha ki waheh chnong toh kiwa du chipor donhi wei da toh por wow pynuiñ noh ki heiwa ka JHADC da rai ko leh wow pynbiang daki ID wa e daka hi.
U Lipon da pyntip u leh wa ynne ka sngi da yachem wa u CEM ka JHADC yow pyntikna wa yaki ID ki waheh chnong u e noh daka Council, kamtæ da kyntu u ya ki waheh chnong leh kiwa ym pu em yoh sanat wow leh noh ki yeiwa emkaam yoh yoh ki yaki ID.
Kamtæ ya kini ki ID wa chipor da toh wow pynuiñ ki cha ka synjuk wei yaki ID wa thymme ye u lai yaleh hi naka JHADC kamjooh lyngba ka synjuk.
