Pynche ki BSF yeiwa jia ya u Doctor Veterinary

Ka Border Security Force (BSF) Meghalaya ynnin da pynche ko heiyatoh wa iwa jia ya u Veterinary Doctor, u Dr. Seiboklang Buam uwa da ong wa chah maham siat wei da chah pynlooid sula u ha ki chipai BSF haka 11 tarik ha Lakroh wa em haka thaaiñ Muktapur, West Jaiñtia Hills District.

Ki BSF da ong ki wa ini waroh toh i chah pynbaad wei wow yahbakla ya ki paidbah neibhah ka BSF kreh ko neibynta i man skem u pood ka ri wot hapyrdi boon i eh i khor.

Katkam i pynche, kini ki chipai ka BSF toh kiwa pait ya u pood India-Bangladesh haka thaaiñ Hawaitila wei heini i por da yoo ki ya uwi u bru wa lai cheiliang ka Lakroh Nala chajan bha wa u pood ka ri.

“Hadien wa pynsangeh ki BSF ya oo, uni u bru da pynsñiaw u yei wym sñiawsuk wei da sñiaw u wa chah yoobeiñ u neidaw wa man u kam u Doctor Veterinary kani ka thaaiñ. Manda pynsangeh ki BSF oo, da sdang u wow riñ Video ya kani ka thaaiñ khappood wei kamjooh ya ki chipai BSF wa em ha kani ka thaw. Hanla da phah ya oo wow sangeh u wow riñ Video, ym ap u yeini. Wei da mih u na ini i thaw deiwa maham ya kini ki BSF. Hadien won da wan u wa ki kattu katni kiwa chong chnong wei da sdang ki wow awri ya ki BSF wei da riñ Video ki yow dai sarom ya ki BSF,” da ong ka kyrwoh na u PRO ka BSF Meghalaya.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

U PRO da ong u wa ki BSF wa da booh ha khappood toh yow yada ya ki paidbah kiwa sah ha ki thaaiñ khappood wei kam ini i chah pynbaad daw pyndooh mynsien ko ya ki chipai kiwa hap kreh ha ini i thaw iwa da eh chwa wei kam ini wa jia da warah ko yei eh wei iwa pyndooh yei chaniah.

Hadien ini haka 12 tarik da pynman yaka yalang ha yung krehkaam u SDO (Civil) Amalarem hei pynlai u SDO, u Dr. Abhishek Saini deiwa emlang u SDPO Amalarem Sub- Division neitæ u Dr. Seiboklang Buam, u SHO PS-Muktapur deilang wa ki heh BSF.

Ha kani ka yalang, ki BSF da kam ki wa da chem yeiwa sakhiat iwa pynoo wa ini waroh toh i pynbaad wei da ye wow pynkut yeini i kaam deiwa yasuk noh.

Ha kani ka jooh ka sngi da khut yachem leh da u MLA ka thaaiñ, u Lahkmen Rymbui heiwa da emlang wa u Additional Home Secretary Government of Meghalaya, IG Law & Order (Meghalaya Police), IG Border wa u IG BSF Meghalaya yow yaklam ya ini wa jia.

U Inspector General ka BSF Meghalaya hadien wa khana u yeiwa jia, da kular u leh wa ki BSF toh kiwa kreh neibynta i bha i miat ka ri.