Pynche ki MO yong ka DM&HO, EKH heiyatoh wa i pynemkaam da ka Ambulance wow kit ya ki Punjabi

Jowai: Hadien wa mih khubor wa chah kem kawi ka Ambulance wa kit ya ki 13 ngut ki Punjabi na Guwahati cha Shillong ha ki thaiñ Umsning neiliang ki ynñiaw ngut ki Medical Officer (Doctor) kiwa kreh hapoh ka yungkrehkaam DM&HO, East Khasi Hills da pynche ki yeini waroh.

Da ong ki wa u Gurnam Singh toh uwa kreh ha kani ka yungkrehkaam kam u Duftry (Peon cum Messenger) hapyrdi kani ka yungkrehkaam wa ki bank wa ka Treasury Office wei da toh u chongngiah noh u hadien le snem.

U Gurnam chirup wa kiwa hayung yong oo da wan ki na Punjab wei da poi ki ha Guwahati ha ka 3 tarik uni u bnai wei da neh ki ha Guwahati neidaw wa em i awri ha Shillong, wei katwa man ki ki Punjabi kiwa spong ym em ki kari kamai kiwa bien wow kit ya ki cha Shillong wei da neh ki ha Gurudwara wa em ha Fancy Bazar, Guwahati.

Hadien wym emlaad de ya oo wa kiwa ha yung wow wan cha Shillong, da paan yarap noh na u Dr. Manoj R. Basaiawmoit uwa man uwa heh dooh u Medical Officer ha kani ka yungkrehkaam DM&HO.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Neiliang u Dr. Basaiawmoit da yaklam u wa kiwi kiwa yakrehlang u wei da rai wow phah da ka Ambulance wow thooh ya u Gurnam wa kiwa hayung yong oo ha ka 7 tarik uni u bnai. Hadien ini u Gurnam da pyntip u wa em kiwa hayung u kiwa kreh sorkar wei da sahkut ki ha Guwahati wei waroh em ki 13 ngut wei dap hah ya uwa yah wow lai thooh u ya waroh wei yeini da leh khlem pyntip cha ka DHS (MI).

Neidaw wa kani ka yungkrehkaam ym em kari ko wa da mang ya ka kam ki Bolero, Scorpio da em du kawi donhi ka Winger Ambulance kawa pynemkaam ha ki kaam kani ka yungkrehkaam.

Neiliang kani ka yungkrehkaam da pyntip ko yeini cha u ASP ka Police Reserve deiwa kyrpaad wow e yarap lada emkaam ha iwon iwon i por wei hawa liwan ko cha Shillong manda poi ha Umsning da chah kdong ko ha ki thuk-thuk wa ki kari khian wei neiliaang uwa yah da psiah u cha pchem ka Umsning Police Station wei da pyntip u yeiwa jia ha u OC yong kani ka thanat wei uwa yah da pyntip u cha ki Medical Officer wei hadien ini neiliang u ASP Police Reserve da phah smat u wow e yarap cha ki.

Neiliang ki pulit ka Ri Bhoi wa ka East Khasi Hills da sonteri ki ya kani ka Ambulance hadooh wa poi ko cha Shillong, wei da booh ya u Gurnam Singh wa kiwa hayung u ha Quarter DHS Complex, Laitumkhrah, kiwi won toh kiwa sah ha Laitumkhrah Beat House, Bhagyakul NEHU Campus, MES Quarters Goraline, wa Camel Hump Road.

Neiliang ki Medical Officer da ong ki wa ym em i daw namo i thmu wa sih ha lyndet wa phah lai thooh ya u Gurnam wa kiwa hayung.