Hadien wa hær ki khubor hamsaya wa em u bru wa uiñ cha wah chaneiñ deiwa rah tari wow dung bru ha North Garo Hills, neiliang ki pulit da pynche wa ha ki thaaiñ Mendal ha ka 31-07-21 da em uwi u bru uwa da chah pynyap deiwa chah dung ha i thaw wa dang haap hapoh ka Bajengdoba Police Station.
Hadien ini i jia da sdang wow poor ki khubor hamsaya ha ki Social Media wa em u “Black Man” wa uiñ cha wah chaneiñ wow leh ya kini ki kaam. Ki pulit da ong ki wa ini toh iwa bakla neibhah ki pulit hadien wa pynman yei takit da yoh ki wow kem ya u bru wa emkti ha ini i kaam hapoh 24 kynta. Ka takit da chem ko leh wa uwa pynyap bru da leh u yeini neidaw wa ya kajai hapyrdi ki arngut.
Ki khubor hamsaya da mih biang ki hadien ini wa da em soo ngut ki bru kiwa da uiñ ha ka thaaiñ Mendi-Soksan kiwa rah tari rah wait heiwa da kam wa kini da dat ki ya uwi u bru deiwa pynemkaam da ki tiar wa nep ha chnong Mongpangro. Da em leh kiwi ki khubor hamsaya ha ki Social Media wa kawi ka kynthai da chah pynmynsoo ko ha ki bru wym tipmit heipor miet ha chnong Pakmagre.
Ki pulit da ong ki waroh kini ki le tylli ki kaam da jia ki ha i por wa yajan iwi ya iwi wei da sñiawthooh bakla ya ini da ki bru ha ki Social Media iwa da pyntieñ wei pynsier ya ki bru heiwa ya kini waroh da dep pyntikna da ki pulit ki wym toh kiwa emyatoh iwi ya iwi wei ka takit dang lai ko chakhmat yow chem ya kiwa emkti ha kini ki kaam.
Kamtæ da kyntu ya ki paidbah wow em ki yei kitkhlieh wym toh wow chaniah ya iwa ym tika wei wow pyntikna chwa wow pynpoor ya ki khubor.
