Ka Superintendent of Police ka East Khasi Hills da pyntip ko wa haka 2 tarik uni u bnai heipor wa lai Patrolling ki pulit hei janmiet da chem ki ya u bru wa uiñ cha wah cha neiñ ha Bimola Point, Shillong wei hadien wa yaklam ki pulit wa uni u bru da pyntip u wa i pyrtuid u toh u Bhim Bahadur Chetri wei da pyntip u wa ym sñiaw chait u, kamtæ ki pulit da phone ki cha ka 108 kawa da poi wut wut yow kit ya uni u bru cha Civil Hospital Shillong.
Ki pulit ka Cantonment won da pyntip ki cha ki pulit ka Jhalupara neidaw wa uni u bru da pyntip u wa toh uwa sah ha Jhalupara. Ha i step ka 3 tarik won heipor 9:40 da pyntip kiwa na Hospital wa uni u bru da yut u napoh ka thaw wa booh kset ya oo namo ka Isolation Room iwa da leh katkam ki kyndon wei da yoh u wow yut napoh kani ka kamra heipor 4:30 i step.
Ki pulit hadien wa tip ki ya ini, da pyntip ki cha u In-charge ka Jhalupara yow pyntip cha u waheh chnong wa u Secretary ka Jhalupara kiwa da pyntip won wa uni u bru ym toh uwa chong wa sah ha Jhalupara.
Neiliang won ka DHS da pyntip ki cha ka SP wa uni u bru u Bhim Bahadur Mogul iwa da e pyrtuid won u heipor wa psiah u ha Hospital toh u bru wa dih Drug wei katni da chitom (Withdrawal Symptom) u neidaw wa dooh drug u .
Da phah leh yaki pulit wow lai ki cha ka Check Point ha Mawiong yow pynsakhiat wa uni u bru psiah u cha Shillong haka 30-03-20 tangwa ym em chem yei pyrtuid u hapoh ka Register wa da booh ya waroh kiwa psiah waroh 24 kynta.
Hadien ini da pyntikn won daka Manbha Foundation wa u Bhim Bahadur Thapa i pyrtuid wa da e da uni u jooh u bru toh uwa dang chah sumaar ha ki wei dang leh u yaka Substitution Therapy wei haka 1 tarik uni u bnai dang wan u naka Manbha Foundation wei da e ya oo i dawai wa boon yow neh u ha ini i por wa em ka Lockdown.
Ki pulit dang thooh ki ya uni u bru deiwa ong wa yut u neidaw wa tieñ u yei chah kyntait naka imlang sahlang lada suba wa yoh COVID-19 u.
(Feature Image- Representational Only)
Discussion about this post