Ki Specialist Doctor ka jylla Meghalaya ynne ka sngi da yachem ki wa ki laad pathai khubor ha Shillong yow pynche pynsñiawthooh paidbah hajrong u khñiang COVID-19 deiwa jubab ya kiwa boon iwa da kylli ha ki heiwa da emlang leh u DHS(MI) u Dr. Aman Warr.
Iwi na kiwa da pynche ki toh wa ym pu ye wow ong deiwa tikna wa lada ha ki por tlang daw joor i poor uni u khñiang neibhah hanla heipor wa sdang nyngkong u na China ha Wuhan iwa man i por tlang wei katai ka chnong leh man ko kawa kjam tangwa ha ri Australia kawa man lyuir da i por tlang, uni u khñiang poor u kamjooh, tangwa kamwa jooh yoo ki heipor por tlang, jooh boon hi ki bru wa yoh kjut. Neidaw leh wa uni u khñiang toh uwa dang thymme kamtæ em boon kiwa ym tip chaphang yong oo tangwa tip hi wa yap u manda chit.
Da pynche leh wa heiyatoh wa i dawai Vaccine namo i dawai yada, deiwa ong wa ini ym toh iwa pynchait wei toh du wow yada na uni u khñiang wei hadooh katni ym pu em i dawai wa da em kyrpang yow pynchait na uni u khñiang. Kamtæ da ong wa manda dep hadooh kamwa 60% ki bru wa yoh ya i Vaccine daw ye wow bichaar wa lada da ye wow pyndooh yei poor uni u khñiang wei kat hadooh itæ i por hap hi wow bood yaki kyndon wow yada ya idæ.
Da pyntip leh wa neidaw wa i dawai Vaccine ha India ym pu em poi i cha ka yaw ka haat, kamtæ ym pu nood wow ong katwon u chongdor i tangwa daw yaleh wow kynthup lang wa ini i dawai leh daw em i hapoh ka MHIS.
Heiyatoh won wa iwa da sdang kheiñstiñ ki paidbah wow yada ya idæ, da ong wa boon ki bru ym em de chimkhia ki hadien wa yoo ki wa 80% kiwa yoh ya uni u khñiang toh kiwa ym em chitom tangwa hawa pait won ya kiwa chah ktah joor kam kiwa da heh rta, 10% na kiwa yap toh kiwa da heh rta. Wei lada kwah wow pyntkut noh yeini i poor uni u khñiang wei wow yada ya kiwa da heh rta, toh u man ko i bahkhlieh yong waroh wow leh ya ini.
Hajrong won wa tieñ ki bru wow lai cha Hospital katni, da ong wa ki Hospital man ki kiwa khooid chiboon chah bar yaki yaw ki haat heiwa ha ki thaw sumaar da pynbiang lut yaki laad yada wei ki wakreh leh toh kiwa da chah sikai bha kammon wow yada wei yaka thaw leh toh kawa da sait dawai bha. Kamtæ ym toh wow tieñ wow wan cha ki Hospital. Da ong leh wa ini da booh ko hei eh wow sumaar ya kiwa yoh COVID-19 neidaw wa da wanrah ya kiwa chitom manda poi u pood wym ye de u yarap.
Hajrong i leh ya ki Test won, da pynche wa ka RT-PCR toh ka Test kawa bniah bha wei lada chem ko wa em du kajiak uni u khñiang leh pynyoo ko toh uwa da yoh ya uni u khñiang tangwa kani ka Test ym ye won ko wow ong wa lada u/ka wa yoh ya uni u khñiang ye u namo ym ye u wow pynpoor cha kiwi ki bru wei na ini i daw em kiwa chiyung kiwa yoh wei kiwi naka jooh ka yung kiwa ym em yoh.
Da khana leh waka Rapid Antigen Test toh kawa tikna du kamwa 50% wei na ini i daw da phah chong leh Quarantine yaki bru 7 sngi hadooh 10 sngi ya mih ki dak ki chin wa chitom ki kawa man leh kam chibynta yow pynduna yei poor uni u khñiang. Ini mut wa lada kani ka Test pynyoo wa ka Result man ko Negative hanla kattæ leh ym ye u man iwa tikna, kamtæ emkaam wow leh yaka Quarantine.
Ki Doctor kiwa da emlang ha kani ka sngi toh Dr. H.C Lyndem, DHS (Research), Dr. Andreas Dkhar Jt. Director kamjooh u Consultant Surgeon Superintendent ka Civil Hospital Shillong, Dr. Vijay Nongpiur, NEIGRIHMS, Dr. Eva Shadap, Pathologist, Dr. Jeremy Buam, Dr. Meban Kharkongor, Dr. D. Laloo wa kiwi kiwi.
