Jowai: Ynne ka sngi kaam u pyntip pynche paidbha ia ka Mudra Loan kawa em hapooh ka skhim Pradhan Mantri Mudra Yojana ka Lead bank wa ka State Bank of India Jowai Branch da pynman ki da ka ialang paidbah kawa khut ki kam ka Megha Camp on Mudra Loans hapoh ka District Library Auditorium, Jowai.
Kani loan kawa da tip kam ka Mudra Loan toh ka loan kawa ki bru kiwa em dukan, kiwa dai jhur, kiwa chna ki mar kiwa boon jait nadooh ki kchu, chna wait kiwa thain kriah wa kiwi ki khih wa khian kiwa da tip leh kam ki ‘Micro Unit’ ye ki u ioh hadooh 10 Lak hapoh kani ka skhim.
Ia kani ka Mudra loan da pyllait paidbah da u Narendra Modi nadooh u bnai April iong uni u snem. I jingmut MUDRA toh Micro Units Development and Refinance Agency i thmu iong ka toh u pynioh poisa cha ki paidbah deiwa smat khlem em boon ki pynbiang ia ki kot ki sla kam hawa chim ia kiwi ki loan. Deiwa smat u pynpoi ia ka poisa ha kti ki nongkhaïi da yooluti wa ye ki u pynmih wa u thied ia ki mar khlem artatien de.
Ia kani ka loan da iabhah ha le tylli ki bynta kitæ toh 1. Shishu: Kawa ye u ioh Rs. 50,000 2. Kishor: ha kani won ye u e palat Rs. 50,000 hadooh Rs. 5 lak kawa 3. Tarun: ha kani won ye u e nadooh Rs. 5 lak hadooh Rs. 10 lak.
U D.M. Wallang, ADC ka West Jaintia Hills District, da ong u wa i thmu iong ka sorkar pyrdi u booh ia kani ka skhim toh u pynlait ia ki piadbah na ka kti kiwa e ram, iwa mut u pynlait ia ki bru na ka chim ram na kiwi tawan ki bru. Neibhah dei chim ram ki na ki nong e ram boon ki por ki khein sut ki da iwa heh, kani ktah bha ko ia ka nong ka kot ki bru.
U Arun Kumar Kembhavi Deputy Commissioner ka West Jaintia Hills kam u kongsan da kyntu u ia ki paidbah u chim kabu ia kani ka lad yow wanrah ia ka kylla ha ka khih ka khan, neibhah ong u wa i thmu hi ka sorkar toh u e lad ia ki nongkhaïi u pynheh pynsan ia i khih ki.
Ia ka ialang da pynlai da u Ralte Ralkhuma, Chief Manager (Lead Bank) Ribhoi & Jaintia Hills Districts,Shillong, wei da ioh leh i klam na ki nongkreh bank wapher wapher kiwa kynthup ia ka kong Barisharlin Kharbithai BM. BOI, Jowai, na ka kong Emmaiami Litting BM UCO Bank Jowai, wa na ka kong W.Shadap BM, Union Bank Of India, Jowai.
Na ka liang ki wa kreh ki bank leh da kyntu ia ki paidbah u wan mih ki cha ki bank wapher wapher kiwa em hapoh ka chnong Jowai kamjooh leh u thap pyrtuit iong ki ha katai ka skim khnang wa i khih i khan iong ki u heh u san ki.
Discussion about this post