Ka District Legal Service Authority (DLSA) ynne ka sngi chirup wa ka yung krehkaam u Superintendent of Police, West Jaiñtia Hills wa ka yung krehkaam ka District Child Protection Officer District Child Protection Unit da pynman ko ya i esikai hajrong ka “International Day of Girl Child (Rights)” namo ka sngi wow kynmoo ya i hok ki khynnah kynthai.
Kani ka esikai man ko kam chibynta yong ka “Azadi ka Amrit Mahotsav” wa ka “Legal Service Week”.
Ki bru chemphang kiwa da klam ha kni ka sngi toh ka R.M. Kharsyntiew MJS Chief Judicial Magistrate-Cum-Secretary DLSA West Jaiñtia Hills District, u Officer In-charge ka Jowai Police Station u B.R. Marak, ka Women Police Sub-Inspector Jowai Women PS ka I. Kharpran, ka M. Mawlong PO/DCPU wa na u Muktiar u D. Lamare.
Ha i e sikai da khana ya ki hok yong ki khynnah wa ki kynthai khnang wow lait ki na iwon iwon i chah thombor wa i chah ban beiñ ha kiwa boon ki liang, heiwa wot ka sorkar leh da pynkrehkaam ko ya ki aiñ wow yada ya ki khamtam ya kiwa em hapoh 18 snem i rta.
Da pyntip wa katkam wa chem da ong wa i chah banbeiñ ki kynthai toh nei chongkha dang khian rta heiwa da chah pyndooh ki ya i hok yong ki kam i stat i tip, i khih i kreh wa kiwi kiwi.
Hajrong i chah thombor ki khynnah kynthai ye wow pyntip wut-wut cha ki bor ka aiñ næ deiwa phone ha u 1098 næ deiwa lai cha ki Police Station wa hajan khnang wow yoh ki yei yada wa paka.
