Pynche u Chairman ya kiwa chah kyntait ha ka Personal Interview ha ka DSC

Jowai : Hei yoh u yaklam u WYRTA wa u DC ka WJH u A. Kembhavi uwa man leh kam u Chairman ka DSC ynne ka sngi hei yatoh wa chah pyndooh ki 9 ngut u em bynta ha ka Personal Interview yei kaam Soil and Water Conservation Department Demonstrator (Jr I) da ong u wa na ki 9 ngut wa da chah pyndam (Disqualified) kamwa 5 ngut da wan yachem ki wa oo hapoh ophis u wei da ong ki wa ym em bood kot tooh ki namo ym em u yabood uwi ya uwi.

U DC da ong u wa hadien wa da pait biang ya ki Answer Script kiwa em ya ki roll number wa yajan wa em ya u 84, 86, 165, 166, 257, 258, 262, 263 wa 264 da chem wa i thoh yong ki toh iwa ya sariem bha hadooh em kiwa thoh i jooh i jooh i jubab yei jingkylli wa ym em e heipor exam.

Neiliang ki wa pynbait (Examiner) ya ki Answer Script da yoh ki u pait biang ya ki Answer Script da rai ki wa kini ki 9 ngut toh ya sariem bha i thoh i khamtam ka Essay wa ka Letter Writting kamtæ da e rai ki examiner wa kini ki 9 ngut toh kiwa ya bood uwi na uwi.

Kini ki 9 ngut toh kiwa chong ha ka Room No. 4,10 wa 11 wei da chong ar ngut ha kawi ka ben.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U DC da ong chooh chooh u wa da chong pyrkhat ki hadooh 4 sngi yow disqualify ya kini ki 9 ngut heijooh i por leh ong u wa lada kiwa chah pyndooh ym hun ki yeiwa leh ka DSC ye ki u booh da ka RTI yow paan ya jar jiar ki answer script wei yow yoh ki u pyntikna (compare) yeiwa thoh ki. Kamjooh leh ye ki u lai cha ki yung bichaar.

Ya kiwa da chem wa leh tooh nadooh ka Written Test hadooh kiwa dang dep chah disqualify daw chong yalang ka DSC yow rai wa kammon u leh ya ki.

Ynne ka sngi leh da wan ka Principal ka Government Boys’ HS School, Jowai yow yaklam neibynta ki wa sikai ka skur kiwa da yoh ya ka Show Cause Notice heiyatoh wa ym em leh ki yei kaam ki kam ki Invigilator heiwa ki khynnah wa chong ha ki kamra ki da yoh ki u bood lang heiwa u DC da ong u wa dang yang yei jubab na kini ki wa sikai wei hadien ini u rai kammon u leh ya ki.

Da ong u DC wa ha ka Result wa pynmih thymme em ki Roll Number 27, 28, 279 wa 280 kiwa yajan bha kiwa da mih pyrtuid kam kiwa da pass, tangwa ya ki Answer Script yong ki da dep sylli bha wei da cham wa ym em u ya bood lang ki.