Jowai: U Montri Rangbah ka jylla, u Conrad Sangma ynne ka sngi da pynsñiaw u wa ka sorkar ymye ko wow leh iwon iwon heiyatoh wa i ku dor i phniang kari ha ka jylla, neibhah wa man i katkam wa man ha kylleiñ ka pyrthai.
Da ong u wa i dor i petrol wa i diesel dang rap duna i ha Meghalaya hawa wyrchaw wa kiwi ki jylla ka ri India, ha i jooh i por da ong u wa ka sorkar India ym em booh subsidy ko neibynta i petrol, deiwa pynrap wa hanla ka sorkar jylla ye ko wow pynbait ya ini deiwa pynduna ya ka VAT, tangwa ya katni ymye u leh iwon iwon neibhah wa ka jylla duna poisa.
Ha iwi tawon i liang da pynsñiaw u yei sñiawkhia yei chah kset ka tulop kiwa sikai SSA, u Conrad da ong u wa i chah kset ka tulop kiwa sikai toh hadien wa ka Project Approval Board (PAB) da pynbait ko wa ya kiwa sikai daw su kamjooh ha waroh kawi ka ri India, heiwa ka jylla Meghalaya wa kiwi ki jylla da kyntait ki wow pdiang ya ini wa pynbait thymme ka PAB ya ka tulop.
Da ong u wa i pynduna syndet ya ka tulop da ktah i leh ya ka muna ka sorkar jylla, wei ini man i i wym sñiaw yahaap.
Da ong u leh wa toh na ini i eh i khoo kiwa sikai ka sorkar haap mynjur ko kattu katni ki kyndon wa da booh da ka sorkar India wei katni ka PAB da mynjur ko ya ka tulop wei iwa sah toh ya ka muna poisa ka sorkar India wow pynlait ya ka tulop.
Discussion about this post