U DC ka East Jaiñtia Hills District da pynche u yei poor i Video wa chah pynbaad u deilang wa u pulit Personal Security Officer (PSO) yong oo wa da tba kti ya uwi uwa yah kari ynne ka sngi.
U DC da ong u iwa chah riñ Video toh iwa da jia hajan i chnong Wahiajer ha u sarok NH6 heipor wa dang lai u cha Lumshnong yow chimbynta ha ka Annual Day Celebration ha Divine Words Secondary School, Lumshnong wei heijooh i por yow pynlai ya ka yalang wa u Project Director, DRDA, East Jaiñtia Hills District, Block Development Officer, Lumshnong C&RD Block, waroh ki Gram Sevak wa ki BTA kani ka Block.
Heipor wa dang lai luti da jia iwa joor bha i sahkut kari nadooh na Thangskai hadooh Wahiajer neidaw wa em boon ki kari wa sih ha kiwa boon ki thaw.
Kamtæ uwa yah kari u DC da e dak u ya ka kari wa em hakhmat wow tia ko chakhmat tangwa uwa yah ya kani ka kari wa em hakhmat da pynkhor pathan u oo uwa yah kari u DC. Uni u bru toh uwa ya yah ya ka kari wa em Number ML-11-4554, Mahindra Camper Pick-up heiwa u DC da pyntip u ym em kwah u jia iyi iyi kamtæ da suki hi-eh.
Tangwa hadien wa lait kari kajiak chisien wei da phah uwa yah kari u DC ya kani ka kari Pick-up wow lai chakhmat, ym bien hi wot u wow lai wei wow e laad wow lai da ki chwa.
Ha ini i por, u PSO toh uwa da em cha lait yow lai pynlait kari, kamtæ u DC da hiar u wow yaklam wa uni uwa yah Pick-up wei da kyrpaad ya oo wow e laad u lai ka kari u wei heini i yaklam da chem wa uni u bru toh uwa da muaid, kamtæ da phah ya oo wow kyrriah u ka ka kari u cha rood.
Uni uwa yah Pick-up da jubab u deiwa khor ya u DC wei da pyn-eh u oo, kamtæ u DC da pyrchang u wow sai ya u chabi kari yow lait u wow yah kari deiwa muaid heiwa heini da mih i yaleh hapyrdi u DC wa uni uwa yah kari u wym e laad ya u DC wow sai ya u chabi.
U PSO ha ini por da poi u ha ini i thaw wa jia wei manda yoo u yeini i chah pynkhor ktien wei i yaleh pyrchah ya u DC da uni uwa yah Pick-up, da wan u wow leh yei kaam yong oo wow yada ya u DC wei da pynemkaam bor u malu mala yow pynlait ya u DC nei chah ksoh ha uni uwa yah Pick-up.
Hadien ini da chah yalang uni u PSO da ki bru wym tipmit kiwa da pynemkaam da ki ktien wa khlem akor hanla pyrchang katwa pyrchang leh wow pynche yeiwa jia.
Kini ki bru ym du wa pyrchang ki wow pynkulmar tangwa da khang laad ki leh ya ka kari u DC wow lai chakhmat wei du hadien wa wan ki pulit da yoh laad u DC wow lai chakhmat.
Ya uni uwa yah kari Pick-up da lai yah ya oo wow leh Medical Test heiwa da pynsakhiat wa man u uwa da muaid wei ym biang de wow yah kari ha itu i por.
U DC da ong u wa da sihlet ya ini wa jia neibhah da mih chiboon ki chah pynbaad wa ki klam beiñ khlem da tip yeiwa jia sakhiat hawa i thmu toh wow pynchngaaiñ yei lai i wan yow lait kiwa muiad kiwa yah kari ha uni u sarok.
Discussion about this post