Jowai: U waheh chnong ka Tuber Kmai Shnong u Graham Lyngdoh uwa chah pynbaad ha u heh ka North East indigenous People Federation (NEIPF) u Marshall Biam da pynche u wa da phone u ya u Marshall kam u lok wow yaklam ya ki kaam wa emkaam wa oo.
U Graham da ong u wa u Marshall da phah u wow yachem ya oo heipor kamwa 12:30 i sngi wei manda poi ha Lad Rymbai da phah won u Marshall wow yachem ha Rymbai Road wei manda poi ha Rymbai Road da phah u Marshall wow yang chibet chipor wa kwah u yachem wa ki lok yong oo.
U Graham da pyntip u wa hadien ini da phone u ya u Marshall uwa da phah ma phah yang ya oo hadooh i por 6:30 i janmiet wei hadien wa yoh phone na u Marshall da phah yachem ya u Graham wei manda poi ha i thaw yachem da em ka kari Gypsy rong lieh kawa ym em number kawa kam u Marshall wa toh ka yong oo kawa da kam wow pynemkaam yow lai yalap Election MDC 2019.
Katkam wa pyntip u Graham, u Marshall da mih u napoh ka Gypsy wei da psiah u hapoh ka kari u Graham wei da phah yang u ya ki lok yong oo cha lait wei hapoh ka Gypsy da yoh ki u yaklam chaphang ki kari wa kit Clinker, khyndawbilat wa moochuni wei ymtoh kamwa da pynbaad wa da klam chaphang i kit mooyong wei da pyntip u Marshall wa da dep ujor pyrchah ya ki pulit ha ki SP ki soo District kiwa em ha ri-loom Khasi, Jaiñtia wa Ri-Bhoi wei da kyrpaad u ya u Graham wow pynman yalang (Meeting) hapoh ka chnong yong oo wei u Graham leh da pdiang u ya ini wei da kyrpaad u leh wow pyntip lang ya waroh ki tre kari wa kiwa yah truck yow yohlaad wow pynsñiawthooh paidbah hajrong ini i kaam.
Kamtæ u Graham da pyntip u wa ha ka step ka 6 tarik uni u bnai da phone biang u Marshall ya oo hei step wow phah wan ya ki paidbah ha ka thaw wa da booh wow pynman yalang ha Tuber Takhniang wei da wan u Marshall heipor 11:30 i step ha kani ka thaw.
Hadien wa sdang ka yalang da klam wei da pynche u Marshall hajrong wa da ujor ki dkhot yong oo ha ki pulit wei oo kam u heh ka seiñ da kulmar u neibhah da leh ki khlem pyntip cha oo.
Kamtæ da mih ka sur paidbah wow pyndam noh ya ka ujor hakhmat u SP ka East Jaiñtia Hills.
Ha ini i por chwa wow mih na kani ka yalang da khut yei pyrtuid ki 6 ngut hakhmat ki paidbah wow lai lang wa u Graham wa kynthup ya u Hamlen Rymbai, Cheerful Ryngkhlem, u Nidamon Chulet, u Defend Pakem, Rock Sympli wa u Sambormi Lyngdoh wow lai cha ka yung krehkaam u SP ka EJH ha Khliehriat.
Kamtæ da mih u Marshall da ka kari Scorpio ka rong lieh kawa em ya u number ML-04C-3777 kawa wan hi u ymtoh wa da kit yabor ya u Marshall katkam wa da pynbaad u.
Manda poi ha Wapung Skur u Marshall da pynsangeh u ya ka kari yong oo wei da wan psiah u ha ka kari wa emlang u Graham khlem em wa pynbor ya oo hadooh wow poi ha ka yung krehkaam u SP ka EJH.
Ha ini i por katkam wa pyntip u Graham, u Marshall da khang u ya ki wymtoh u psiah lang ki cha kamra u SP wei da pah yang u ya ki cha lait.
Hadien wa mih u na kamra u SP da khut u ya u Graham wa kiwi cha Rymbai Road deiwa e daw wa haap li thooh u ya ki kot ki sla wa emkaam na yung wa sah u.
Manda poi ha Rymbai Road da phah sangeh u ya ka kari wei da lai psiah u ha kawi ka dukan Pharmacy wei da yachem lok u deiwa e daw toh kiwa kyrchaan ya oo ha kani ka Election MDC wow wan wei ha ini i por ki pulit da wan syndet ki wei da rah ki ya u Marshall wei neiliang u Graham da ong ki wa ymtip ki iyi iyi leh hajrong ini.
Kamtæ u Graham wa kiwa chah ujor pyrchah da ong ki wa ka ujor ymtoh kawa em yurim iyi iyi leh kamtæ da kyrpaad ki ya ki paidbah wymtoh u sñiawthooh bakla ki yei pynbaad u Marshall Biam.
Discussion about this post