Heiyatoh wa i jia ha khappood ka Assam wa Mizoram ynne ka sngi iwa da poi chadooh i dooh yei mynsien ki 6 ngut ki pulit ka Assam, neiliang u montri rangbah ka Assam u Himanta Biswa Sarma da pynche u deiwa ong wa ini toh iwa tyngkheiñ ka Mizoram ya ka Status Quo deiwa chna sarok wa lai cha Rengti Basti, Assam deiwa tympra ya ka khloo Inner Line Reserve Forest wa em ha thaaiñ Lailapur heiwa ka Mizoram leh da booh ko ya ka thaw chong ki pulit ha uwi u loom wa em hajan ki chipai ka CRPF kiwa ym em yachah cheiwon cheiwon.
Kam chibynta wow pyn jai-jai ya i rukom man, ki heh ka Assam wa kynthup ya u IGP, DIG, DC ka Cachar, SP ka Cachar wa u DFO ka Cachar da lai ki cha ini i thaw ynne i step yow kyrpaad ya ka Mizoram wym toh u pynthut ya ka Status Quo.
Tangwa da wan ker kut ya ki da ki bru wa wan neiliang ka Mizoram wa da kyrchaan da ki pulit ka Mizoram. Heiwa ki bru paidbah leh toh kiwa rah tiar wei kiwa sap Helmet kamwa da yooh ha ki Video. Kini ki bru da kawang moo wei da tympra ki ya le tylli ki kari wa kynthup ya ka yong u DC heiwa heijooh i por ki pulit ka Mizoram da siat ki da ki Tear Gas cha ki bru ka Assam heiwa ha ini i da mynsoo leh u IGP.
Hei janmiet won, u SP ka Kolasib, Mizoram deilang wa arngut ki Additional SP da wan yaklam ki wa ki heh ka Assam heiwa da kyrpaad ya ki da ki heh ka Assam wow pyn jai-jai ya ki bru wei ym toh wow e laad ya ki wow chim ya ka aiñ ha kti.
Hadien ini ki heh ka Mizoram da lai yaklam ki wa ki paidbah tangwa u SP ka Kolasib da wan biang u heipor 4:30 i janmiet uwa da ong wa ym ye de wow pyn jai-jai ya ki paidbah wei ha ini i por ki pulit ka Mizoram da sdang ki wow siat ya ki heh sorkar ka Assam kamjooh ya ki bru paidbah hanla u SP ka Kolasib dang yaklam u wa ki heh ka Assam heiwa ki pulit ka Mizoram da chong ki na i thaw wa em na neiñ wei da siat ki da ki suloi (Automatic Weapon) wa kynthup ya ki LMG.
Kamtæ ha ini i jia da yap 5 ngut ki pulit ka Assam kiwa da tikna wei dang pyntikna yei yap sa uwi wei palat 50 ngut da mynsoo ki wa kynthup ya u SP ka Cachar u Vaibhav Nimbalkar uwa da chah siat ha kjat wei da em u hapoh ICU.
U Sarma da ong u leh wa ki pulit ka Assam wa ki heh ka Assam ym em pynyoo kylla ki da ki kaam heiwa ym em wa mynsoo neiliang ka Mizoram.
Da pynkut u deiwa ong wa ka sorkar Assam dang em hi ko yei thmu wow wanrah yei suk deiwa kyrpaad ya ka Mizoram wym toh wow leh ya ki kaam pynmynsoo deiwa kreh yow wanrah yei suk i saaiñ.
