U Symbood Montri Rangbah uwa pait leh ya ka chnat PWD (Roads), u Prestone Tynsong da ong u wa i pynbha ya u sarok Nongpoh-Umden-Sonapur da yaklam kattu da boon snem, wei ya kani da tyrwa wow pynkrehkaam da ka World Bank, tangwa neidaw wa ka World Bank da mang ko du Rs. 1000 klur neibynta wow chna ya waroh ki sarok ha ka jylla, kamtæ neiliang ka World Bank da pynsñiaw ko wa ya uni u sarok da mang noh ha ka bhah wa ar namo ka Phase-2 ka Scheme tangwa hadooh katni ym pu sdang kani ka Phase wei ym slem de daw sdang noh ka.
Da khana u wa u MLA wa u MDC ka Nongpoh wa kiwi kiwa yahkhmat yong katai ka thaaiñ neipor cheipor da pynsñiaw ki ha ka sorkar, wei ha u Wisu (Mar) uni u snem da ye wow pynpsiah ya kani ka Project hapoh ka mang poisa yong ka DONER, wei da chim ya kani ka Project kawa man kawa emkaam deiwa booh ka hakhmat dooh.
Da khana u wa ya kani ka sarok daw chna nadooh Nongpoh hadooh Umden kawa jrong kamwa 20 Km tangwa nei wan noh ka Election Lok Sabha neiliang ka Ministry da hap pynsangeh noh, chooh chooh u Prestone da pyntip u wa ka chnat da pynkhreh ko ya ka DPR wei la kammon kammon ha ka tayaaw wow wan daw phah noh ya ka DPR cha ka chnat Finance wei hadien itæ daw phah won cha ka DONER Minstry.
Da pynche u leh wa ya u sarok na Umden uwa daw mih chadooh Byrnihat uwa jngai kamwa 38 Km da pynpsiah ha ka Scheme PMGSY III, wei neibynta kani da dep pynkhreh ya ka DPR.
U Prestone da khana u wa i lut neibynta wow chna ya kitai ki sarok ym duna i ya Rs. 100 klur.
Discussion about this post