U Montri wa pait ya ka chnat Animal Husbandry & Veterinary ka jylla Meghalaya da pynche u yei mih khubor heiyatoh wa ki kyntien wa ong u baam chiboon chiboon i doh masi heiwa da pynheh cha wa palat ya ini iwa ong u da ki kattu katni ki laad pathai khubor iwa da wanrah yei sñiawthooh bakla ya iwa da ong u.
Da ong u wa ini iwa da ong u toh hajrong wa i khang yei baam doh masi ha Assam iwa da wanrah yei khuslai ya ki jaitbru ri-loom ka Meghalaya kiwa baam doh masi iwa man leh kam chibynta i rukom baam wa da jooh myllien ki.
“Ki bru ka Meghalaya da em ki yei khuslai wa lada pynjop ki ya ka BJP i jooh wow jia, kamtæ yow pynwiar ya ini i tieñ, da ong O ko ya ki bru ka Meghalaya wa daw ye ki u pteiñ wow baam yei doh masi khlem tieñ ya chah khang,” da ong u Sanbor.
Kamtæ da ong u wa ki bru wa em hapoh ka ri India wa kamjooh kiwa em hapoh Meghalaya wa ym toh u sñiawthooh bakla ki yeini wa ong u heiwa da em kiwa da pynkyllaiñ ki deiwi i rukom wei da chim kabu da kiwa em hei pyrchah ya ini iwa da ong u.
Da kular u leh ya ki jaitbru ri-loom ka Meghalaya wa ka BJP u yada ko yei man kyrpang, ka dustur riti, i hok wa i rukom im yong ki.
Da pynkut u deiwa beiñ ya kitu kiwa da pynkylla pynchna yeiwa da ong u du wow pynheh yaw ya ka khubor yong ki.
