Neiliang u Training Phawa uwa da chah pynbaad wa pam u da u sdai ya u waheh chnong ka Tuber Kmai Chnong wa ya u Chairman ka Seinraij Tuber Kmai Chnong, da pynche u wa ka khubor wa da mih ynnin ka sngi toh kawa bakla wei ka wym em yatoh iyi iyi wa iwa da chah ujor pyrchah ya oo.
I yong sakhiat man i kamni, “Nyngkong em ar ngut ki khynroo kiwa man kiwa ha-yung wa nga kiwa da wan-ke wei lai luti ki lyngba ka yung u waheh chnong wei katwa dang lai da em ki kattu katni ngut ki bru wa yieñ ha kdong wa doom wei da klam sih wei da tim sih ki, kamtæ neiliang kiwa ha-yung yong nga da ong ki wym toh u tim sih hapoh chnong poh thaw wei heitæ wot kini ki bru da khyrrup syndon wei da sdang ki wow dat ki, hadien ini, kini da Phone ki cha nga wei nga leh dei tieñ ya jia iyi iyi da wan O wut heitai i thaw wei heipor wa poi O heitai da em boon ki paidbah wa dat ya kini kiwa ha-yung yong nga, wei iwa da phylla won wow yoo wa heitæ da emlang wa u Waheh Chnong, u Miki Lyngdoh, ki Secretary wa ki VDP ki wym em klam iyi iyi wei kiwa pait-ke yeitai wa jia iwa chah dat kini kiwa ha-yung O.”
“Nga dei kulmar da psiah O hapyrdi ki paidbah dei thmu wow pynkhlaad tangwa nga leh da chah dat O wei heitæ i por deiwa tieñ da chim O da kat iwa em chajan wow yada ya idæ wa ya kiwa ha-yung O na kini ki bru kiwa dang boon ma boon kat dang lai i por kiwa da wan toor tangwa hadien da yoh i wow yut na ini wa jia,” da ong u Training Phawa.
U Training da ong u wa i thmu yong oo toh du wow yada ya idæ wa kitæ kiwa ha-yung wei ymtoh kamwa da chah pharep. Da ong u leh wa hadien wa jia leh toh oo hi wa ong chwa wa toh u lai booh noh ya uwa mynsoo cha Hospital neibhah ym em thmu u wow pynmynsoo ya uwon uwon tangwa du wow pynhlaad nei chah dat.
Da ong u leh wa kam uwa chong chnong burom wei maya u ya kiwa yahkhmat ka chnong wei wot hadooh i step yong itu wa jia ym em ujor u pyrchah ya kini ki bru tangwa iwa sñiawsih toh wa da yoh ki wow ujor wei pharep kylla ya oo.
“Khaddooh khatwai neiliang yong nga, nga kyntu wei kyrpaad O ya kiwa chong chnong wei kamjooh ya kiwon kiwon wym toh u pynbaad palat pood khlem da tip yei sakhiat wei nga da kyntu O leh wym toh u bichaar chiliang khmat tangwa e wa ka aiñ u leh ko yeiwa emkaam wow e yei bichaar yow chem yeiwa sakhiat,” pynkut ka kyrwoh na u Training Phawa, Tuber Kmai Chnong.
Discussion about this post