Hadien wa mih ka khubor “Wa e NOC tih Moochuni chah tyngkheiñ u Waheh Chnong wa u Secretary ka Umlong, EJH” neiliang kini ki ar ngut da pynche paidbah ki yeini deiwa ong wa i chah pynbaad ki toh iwa bakla wa iwa khlem yurim.
Neiliang u Waheh Chnong wa u Ex-Secretary da ong ki wa kiwa chong chnong hapoh i yahkhmat ki kattu katni ngut da pynmih khubor ki wa da tyngkheiñ ya u Waheh Chnong, kamtæ u Waheh Chong da ong u, “Nga u waheh chnong wan O chakhmat wow pynche wa ya nga da thung da jied da u paaid wa chong chnong wei da pynshkem da ki aiñ. Ymye O wow kreh pura kam u waheh chnong khlem ki aiñ ki kyndon, katwa ka samoi krehkaam ympu kut ko u pteiñ O u krehkaam kam u waheh chnong neibynta i bha i miat ka chnong”.
Da kylli u waheh chnong wa ki ar ngut kiwa yoh NOC na ka chnong- kiyi ki kitæ ki bru? Ymtoh ki khon ka chnong? Lada ym e NOC ya ki khon ka chnong tæ yeiwi won u e?
Chooh chooh da kylli u wa heipor wa kiwa kitkaam warim ha u snem 2012, da e NOC ki ya ka karkhana pynmih khyndawbilat wa heh 20 wa 30 Hectare wow tih Moohuni da ki baar jylla ki wymtoh ki tre chnong, cheiwon wiar kiwa paan RTI wa kiwa maya rymaw? Weileh adnood ki ya i roi i paar ki khon ka chnong, ki tre ri tre muluk, wei kini ki ar ngut wa yoh NOC toh ya i thaw wa heh du 1-2 Hectare iwa man i thaw wa khian bha lada nujor wa ki karkhana.
Chooh chooh da pynche u wa ya ka NOC da e ymtoh wow tih moochuni noh ki chisiendon neibhah ya ka NOC da e ryngkat ki kyndon kiwa hap ki wow bood thij katkam ki kyndon ka sorkar, wei ymye ki wow tih ya u moochuni khlem yohbor na ka sorkar, lada kini ki khon ka chnong yoh lut ki ya ki kot ki sla wa biang katkam ki aiñ ki kyndon ka sorkar i yohnong u man i iwa khroo ya waroh ki khon ka chnong heiwa u yoh kreh ki kamjooh leh kiwi ki jan chnong.
Puræ leh: Wa e NOC tih moochuni, chah tyngkheiñ u Waheh Chnong wa u Secretary ka Umlong, EJH
