Heiyatoh wa i em wa booh (Post) ha ka 19-07-21 lyngba ka Facebook Account ka yong u Living Rymbai ha ka Facebook Group “Ka Sur U Paidbah” uwa da thoh yaki kyntien beiñ niam wei pyrchah ya ka leh niam Behdieñkhlam 2021 ka Seiñ Raij Tuber, da e yei pynche wa kamni ha wah:
U Livingstar Lyngdoh u khon yong ka Mihsalan Lyngdoh wa chong wa sah ha Khliehriat East, East Jaiñtia Hills District da ong u wa da em wa pynemkaam bakla yei dur yong oo iwa chim ki bru na iwa booh u ha ka Instagram Account yong oo kawa em pyrtuid Denver Lyngdoh heiwa ya ini dur da booh ha Instagram Story yong oo. Em hi u leh ya ka Facebook Account tangwa kani toh heijooh i pyrtuid Denver Lyngdoh hi.
Da ong u leh wa ka Facebook Account u Living Rymbai ym toh ka yong oo heiwa da beiñ joor u ya kiwa chim kabu kiwa da pynemkaam yei dur yong oo wow wai ya ka Facebook Account iwa da pynbood naam ya oo wei ym tip u leh iyi iyi chaphang ka Post ha Facebook kawa da klam beiñ niam.
Da khana u leh wa da tip u ya ini iwa thoh u Living Rymbai du hadien wa Phone ki lok u ya oo kiwa da kylli chaphang ini wei da khyrngiat u hadien wa tip u ya ini wa da em wa chim kabu wow pynemkaam dei dur yong oo wow thoh ya ki kyntien beiñ niam iwa da poor kylleiñ kylleiñ.
Neiliang yong oo, ynnin ka sngi ka 21 tarik da lai ujor FIR u pyrchah ya u Living Rymbai uwa da nood wow leh ya ini i kaam bah iwa da pyndooh burom ym du ya oo kamjooh leh ya kiwa ha yung ha sem kamjooh ya ki lok ki jor wot ya ka kur ka jait wa ya ki khon ka Raij Tuber hi waroh kawi.
Da kyrpaad u leh ya ka aiñ wow chimkhia wow thooh takit hadooh wow chem ya u/ka bru wa leh ya ini i kaam wei wow pynchitom ya ki katkam ka aiñ.
Puræ leh: Ujor FIR ka Seiñ Raij Tuber pyrchah ya u Living Rymbai wa klam beiñ u ya ka niam
