Hadien i chah siat yap ki 5 ngut kiwa chong chnong ka Mukroh ha ki pulit wa ki Forest Guard ka Assam, neiliang ka Dorbar Chnong Mukroh da pynche ko yeiwa jia waroh heiyatoh wa ini i kaam.
Neiliang u Hamboide Sumer uwa man u waheh chnong ka chnong Mukroh da ong u wa ka chnat Forest ka Assam da booh tooh ko ya ka yung krehkaam ha Mukroh ha Khlieh Sanaro heiwa ki paidbah chah pyndik ki dei langer ha ki pulit ka Assam nadooh i thung kba, u saroo, i chare masi/mooid wa kiwi da rah bait ya ki cha Jrikyndeng.
Heiyatoh wa u phlang wow chna yung wei ki dieñ thang diñ leh kem ki pulit wow pynchitom ya ki bru.
Heiyatoh wa i ong wa ka Mukroh haap ko ha Block-I, neiliang u waheh chnong da klam che u wa ka Mukroh hi ym em haap ko hapoh ka Block-I tangwa haap pura ko ha Meghalaya wei ya ki kot ki sla kam ki pata wa ki Land Holding leh da chim na ka JHADC.
Heiyatoh won wa ki khubor ka Assam kam ki wa ka Mukroh haap ki hapoh ka Jrikyndeng Police Station, neiliang u Hamboide da pynche u wa ka Mukroh hi haap ko hapoh ka Nartiang Police Station ka Meghalaya.
Da ong u leh wa ka chnong da kyntait ko ya ka poisa yarap wa tyrwa u Himanta Biswa Sarma neiliang ka Assam cha ki manyung wa da dooh yei mynsien yong kiwa da khlaad.
U waheh chnong da kyntait u leh yeiwa kam ka Assam wa da rah ki paidbah ya ki tiar pynmynsoo ha i step ka 22 tarik tangwa toh ki pulit Assam hi kiwa da siat ya u Forest Guard yong ki.
Heiyatoh wa u mot wa kwah ka Assam wow booh sahkynmoo ya u Forest Guard uwa da yap ha kani ka sngi ya uwa da thmu wow booh ha chnong Mukroh, neiliang u Hamboide da ong u wa la man katwa man leh ka chnong ym chah ko yeini.
Da ong u leh wa ka chnong da dawa ko wow kem wei wow pynchitom ya kiwa emkti wow siat yap ya ki san ngut ki mynsien bru ka chnong.
U Hamboide da pynkynmoo u ya ki 3 ngut kiwa da chah kem kiwa kit kba da ka Maruti 800 ha i step ka 22 tarik heiwa ki paidbah da mih yonglang ki cha Lumpala wow lai yaklam wow pynlait ya kini ki le ngut tangwa ki pulit wa ki Forest Assam deiwa yoo ya ki paidbah da siat ki cha ki paidbah khlem da maham.
U Hamboide da kynmoo u leh ya u snem 2003 heiwa da chah tynyap ki khon ka chnong wei ini da jia i dei langær ha ka chnong wei ymtip ha kani ka kynti kammon u im ki khon ki san ngut kiwa da dooh ya u khlieh ka yung ha ka 22 tarik.
Puræ leh: Da u motdur u Forest Guard wa khlaad u booh ka KAAC ha Mukroh
