Ka Hill Farmer’s Union (HFU) West Jaiñtia da e khublei ko ya u Deputy Commissioner, Jowai neidaw wa da chimkhia u hawa yatoh wa ka yaw dailang ha Ialong heiwa da yoh wow wai biang ka ha kani ka tayaw.
Kamtæ ka Hill Farmer’s Union West Jaiñtia da kyrpaad ko ya ki paidbah wa wan yaw wan haat wow sñiawbha u bood ya ki kyndon yong ka sorkar deiwa deiñ ya ki Mask, u rah ya ki Sanitizer wei wow yajngai kamwa 2 meter uwi ya uwi, khnang wym em iwon iwon i maa ya kiwa wan yaw wan haat.
Neiliang kiwa yahkhmat ka HFU West Jaiñtia da kular ki wow ya emlang wa ki warep lada chem chitom ki wow pynlai ya ki mar rep wa kiwi kiwi de i eh wa chem ki deiwa Phone ha u 7085248688/8414030045.
Sa chisien da kyrpaad ya kiwa wan dai mar rep wow da ki du ki mar-rep kiwa da pynmih napoh ka District wa ka jylla yong i khnang wow yarap wei e bor ya ki warep napoh District wa ka jylla yong i.
