Ka Hynñiewtrep Integrated Territorial Organisation (HITO) da phah ko da ka Open Letter cha u Montri Rangbah ka jylla, u Conrad Sangma deiwa ong wa pdiang ki yeiwa pynche u heiyatoh wa i kylliang chuki ya ki Montri sorkar yow yoh bhah kiwa mihkhmat ya ki thaaiñ waphær waphær.
Ka seiñ da ong ko wa ha kani ka jooh ka yurim ka chuki u Chief Minister leh ymtoh u lait ko heiwa hadooh 8 ngut ki Montri sorkar kiwa da chah kyrriah yow e laad ya kiwi, kamtæ da kylli wa lada u Chief Minister leh ymtoh wow e laad u ya kiwi wow chim ya ka chuki u neibynta ki por wa dang sah.
Da pynkynmoo leh wa ha u snem 1988, u (L) Purno A Sangma uwa man leh u pa u Conrad da mynjur u wow yabhah ya ka chuki Chief Minister da 50:50 wa u (L) B.B. Lyngdoh iwa pynyoo wa kini ki ar ngut ki bru wa khroo ka jylla da booh nongmuna ki wa wot ya ka chuki u Chief Minister leh hoi hi u yabhah ka.
Ka HITO da ong ko wa kamwa man kattæ nadooh u Chief Minister, u Leader of Opposition, u Speaker wa Deputy Speaker toh ki Garo wei da emkaam leh ka bhah ya ka thaaiñ Khasi-Jaiñtia Hills yow man salonsar deiwa ksoh ya ka chuki Chief Minister.
Da ong leh wa em kiwa boon kiwa biang kiwa ye u chimkti nadooh ki Deputy Chief Minister, u Sniawbhalang Dhar wa u Prestone Tynsong hadooh u President ka UDP, u Metbah Lyngdoh.
Chooh chooh da ong wa ym em tang uwi næ kawi leh na ki Montri wa chah pynhiar chuki kiwa da chah pynbaad wa leh ya kiwon kiwon ki kaam wa bakla næ baamtooh.
Kamtæ da kyntu da pynchlur ya u Conrad wow bood ya ki luti kjat wa da pynyoo u (L) Purno A Sangma heiwa daw kynmoo yanom ya oo lada pynlait u ya ka chuki u yow chimkti da uwa mihkhmat na Khasi-Jaiñtia wei daw man ko leh oo moomær wa khroo yong oo hei man u kam u bru wa em ha ki kaam saaiñ pyrthai.
Discussion about this post