Ka kurim u Lat wa thymme ka jylla Meghalaya uwa pait leh ya ka Arunachal Pradesh, ka Neelam Misra (First Lady) da khut ko ya ki paidbah wow pynneh pynsah yei rukom thaiñ that yong rim ka thaaiñ mihsngi.
Ya ini da ong ko ha ka yalang pynyoo ya ka phlim Documentary kawa e pyrtuid ‘Celebrating loin loom weaving through Loin Loom weaving of Arunachal Pradesh’ ha Assam Rifles Headquarters, Laitkor ha ka 6 tarik uni u bnai chaphang i rukom thaiñ that.
Da ong ko wa emkaam wow yaleh u pynneh pynsah ya ini i rukom thaiñ that neini chakhmat.
Chooh chooh da ong ko wa boon kiwa thaiñ that hapoh ka thaaiñ toh ki kynthai wei da pynkupbor i leh ya ki kynthai wow yoh khih yoh kreh ki wei man ko leh chibynta i thmu u Montri Rangbahdooh ka ri, u Narendra Modi wow wanrah ka Aatma Nirbhar Bharat namo wow yieñ hei kjat yong i hi.
Ha ka 7 tarik won da yachem ko wa ki heh ka chnat Textile & Handicrafts deilang wa ki Self Help Group ha Raj Bhavan, Shillong heiwa da kyntu ko ya ki sahep sorkar wow e yarap cha kiwa thaiñ yow pyntikna wa i rukom thaiñ yong rim u neh wei u nang ku i.
Da yaroh ko leh yeiwa da leh ka sorkar wow pynlai yaaw ya ki mar thaiñ deiwa pynchlur leh wow dai ki ha kylleiñ ka pyrthai.
Da emlang leh ha kani ka sngi wa u Principal Secretary Textile, u Sampath Kumar, u Commissioner & Secretary Textile, u F.R. Kharkongor, u Director NIFT, Shillong, u Dr. A. Das, ka Deputy Commissioner East Khasi Hills, ka Isawanda Laloo wa u Secretary Textiles, u T. Lyngwa.
Neiliang ka Kari Lombi, OSD Secretary Textile & Handicrafts, ka sorkar Arunachal Pradesh wa ka Ratan Anya, Chairperson, Oju Welfare Association of Arunachal Pradesh da yaklam ki wa kiwa thaiñ that.
Ha kani ka yalang da pynyoo leh ya ki phlim Documentary chaphang i thaiñ that ha Meghalaya wa Arunachal Pradesh.
Ha ka 8 tarik, ka kurim u Lat da chimbynta ko hei thung dieñ wa da pynman ha Raj Bhavan, Shillong deiwa emlang u Lat ka jylla, u Brig. (Dr) B.D. Mishra (Retd).
