Ka Tep Kyndait Government UP School, Tuber Kmaichnong, East Jaiñtia Hills ynne da saam ko ya ka Exam Result yong u snem 2021, ha ka yalang wa tbian wa pynlai da u Ribait Oo Pde, Assistant Teacher ha pchem kani ka skur.
Ha kani ka sngi da yoh ya i klam waiphang na kawi na kiwa sikai ka skur, ka Waphasan Bareh, heiwa da ong ko, “Ymjooh em kam ini i por ha ka chnong yong i wow saam ya ka Result Exam yong uwi u snem cha uwi tawon u snem, toh du neidaw wa em ka khlam COVID-19”.
Chooh chooh da ong ko wa ki khynnah wa puræ da booh ya ki wow yoh 100 Marks, tangwa ym em u yoh ki, emkaam bha u yaleh yow yoh ya katai ka thong, wymhoi u ong da yoh O 80 Marks tæ dabiang. Kiwa Fail leh wymhoi u dooh kyrmen ki, ka Exam man ko kam ka wow kyrsu yoh u khyrngiat, wymtoh u ong, nga da Fail tæ dakut.
Dayoh ya i klam leh na u Headmaster ka skur, u Riquoma Rq. Laloo, uwa da ong wa i ktah yei man skur ki khynnah ha u snem 2020-2021 man iwa chyrkhei bha, neibhah wym yoh ki khynnah u pynkhreh kamwa mut wamang; tæ yooluti na uni u snem u yoh noh u man ka skur kawa lai bait, dei yakrehlang yong warohlang, yow ye u pyndoohjait ya uni u khñiang kjut.
Deiwa pynrap wa nei man skur kamwa jooh daw yarap ko chiboon ya ki khynnah, heiwa u yoh ki deiwa chong ha ki kamra skur ymtoh da ki Online Class.
Da kyntu u ya ki khynnah skur wow man kiwa dohyap hei puræ; ileh wa e Result kamni halait ya ki wayoh nyngkong, wa ar, wa le toh wow pynchlur ya waroh, yoh phi u booh thong wa hanpaya, nga leh toh u yoh O kamtai kamwa utai næ katai yoh ki.
Heijooh i por da e khublei u ya ka sorkar wa da pynyinsur ko nadooh u Naikhynde 2021 hawa da yoh u pynman skur cha ki thaaiñ palatsor, heiwa ka skur yong oo leh da yoh ko u pyndep kamwa da booh. Da e khublei u ya u Waheh Chnong ka Tuber, u Jiedlang Sana uwa da yakrehlang waka skur na kipor cha kipor, tangwa na ki daw wymye u lait ymyoh u ya emlang ynne.
Hei klam u Chanbor Rymbai, Academic Mentor, Bharti Foundation, East Jaiñtia Hills District da ong u, ka Exam yong ki khynnah skur toh i por bet yong phi ya u symbe; lada bet phi da u chieh, ynne u khait phi da u chieh; lada bet won phi da u kba, ynne u khait phi da u kba.
Ki khynah skur toh u man ki ka nongmuna ya kiwi, lada em ki heiwon iwon i thaw leh; toh u pynyoo ki ya ka nuksa wa bha ya kiwi; la hei klam i kape, i akor, i man i long wa kiwi kiwi.
Chwa wow kut da yoh ya ki kyntien e khublei na kawa sikai hi ka skur, ka Eitilang Siangshai.
Ha kani ka sngi da saam ya ki Result cha kiwa yoh 1st, 2nd wa 3rd Position yong kawi pa kawi ka Class ha lait dep neitæ da saam won ya ki waboon chapoh kamra.
