I dooh thaw puræ (Admission) ki khynnah ha ki kyrdan puræ waphær waphær kam ha ka Class XI wa ha ki Graduation hapoh Ri-loom Jaiñtia dang joor i kat dang lai ki snem wei ha uni u snem da sakhi yeiwa joor dooh i chem chitom ki khynnah wow yoh thaw puræ heiwa hajrong wa da em ki skur kamjooh leh ki College ki bru samen, ka sorkar da yaleh ko katwa ye wow pdiang ya ki khynnah tangwa hadooh ynne ka sngi da em hadooh kamwa 100 tam ngut ki khynnah kiwa ympu yoh Admission ha ki Class XI.
Hawa yaklam wa u Deputy Commissioner ka West Jaiñtia Hills, u Garod LSN Dykes hajrong ini i kaam iwa da embynta bha u wow thooh ki laad wow yarap ya ki khynnah katkam i bor yong oo, da ong u wa da yoh yutip na ki seiñbhalang waphær waphær wa em sa kamwa 100 ngut ki khynnah ki wym pu yoh Admission ha ki Class XI, kamtæ da pyntip u wa neiliang ka sorkar da booh ko ya ki thaw esikai kam ka Industrial Training Institute (ITI), Khliehtyrshi.
Da ong u wa katkam wa man katni dang em sa kattu katni ki Seat kiwa dang lait ha kani ka thaw esikai (ITI) kiwa kynthup ya ka Mason (Building Construction) wa ka Fruits and Vegetables Processing heiwa u DC da man u kam u Chairman ka Committee heiyatoh wa ki Admission ha kani ka ITI wei da phah pynman ya ka yalang yong ka Committee yow tip sa katwon tylli ki Seat kiwa dang lait wei ha ka tayaw wow wan daw pyntip cha ki khynnah, wei lada kwah ki ye ki wow lai puræ ha kani ka thaw.
Heiyatoh wa ki myntoi wa ye ki khynnah u yoh na kani ka thaw, u DC da ong u wa nyngkong yoh ki khynnah ya ka Certificate hapoh ka Craftsman Training Scheme wa da e da ka sorkar India ya kawa da tipmit da ka sorkar pyrdi wa ka sorkar jylla; ye ki khynnah wow sdang u seiñ kreh dei yongki dahi heiwa rap wai ko boon ki laad wow yoh kreh. Ki khynnah ym emkaam ki wow su hawa lai puræ ki ha ka ITI wei ka sorkar leh e ko ya ka Stipend kawa man-u-bnai cha ki khynnah.
U DC da kyntu u leh ya ki khynnah wa katni ymtoh de u kyruiñ ki du cha ki liang puræ kiwa da yah na ki por wa dadep kam ka HSSLC, Graduation wa kiwi kiwi neibhah wa ka sorkar da pynlut poisa bha ko wow pynchlur ya ki khynnah wow lai puræ ha ki laiñ wa yarap wow yieñ pyn ha ki kjat yong ki dahi.
Kam wow kdaw heini ki esikai man-u-snem ha kani ka ITI Khliehtyrshi kynthup ki ya ka Electrician (20 Seat), Stenography (24 Seat), Mechanic (Motor Vehicle) (20), Horticulture (20), Fruits and Vegetables Processing (20), Welder (16) heiwa kini waroh emkaam ki wow pyndep ya ka SSLC katwa ka Mason (Building Construction) kawa em 16 seat emkaam wow pyndep du ya ka Class VIII.
