Yaka sngi wa kyrpang neibynta kiwa em hei duna ha i doh i pran namo ka International Day of Persons with Disabilities da lehkmen yaka ynne ka sngi ha Khliehriat, East Jaiñtia Hills hajrong ka phang wa ong “Building back better: toward a disability-inclusive, accessible and sustainable post COVID-19 World.
U DC ka East Jaiñtia Hills ka District u E. Kharmalki da man u kam u kongsan hei emlang u T.T. Sangma, Secretary District Legal Service Authority, u T. Kyndiah, DCPO, u D. Shylla DMHO, u S. Kamar District Coordinator, DMC SSA haka yalang wa pynman daka District Social Welfare Officer, East Jaiñtia Hills District.
U kongsan hawa e yei klam da kyntu u ya kiwa em i duna hei doh i pran wym toh wow pynlut por ki wow pyrkhat yeini wei toh u pyrkhat yeiwa iyi iwa ye ki u leh wei ym toh wow e laad ya kiwon kiwon ki moochynthut wow pyndooh mynisen wow poi cha i thong. Da kdaw u leh ya kiwa boon ki bru kiwa em i duna tangwa da ye ki wow leh ya iwa boon hei im yong ki.
Da khana u leh chaphang kiwa boon ki Scheme namo ki laad yarap ki wow pynku ya kiwa em hei duna i doh i pran, kamtæ da pynchlur u ya ki wow wan chakhmat wow chim kabu ya ini i e yarap naka sorkar.
Neiliang u T.T. Sangma da klam u chaphang ka aiñ Disability Act 2016 wei da khana u leh ya kiwa boon ki kyndon kani ka aiñ wa yada ya kiwa duna hei doh i pran.
Neiliang ka DSWO da e sñiawbha ko leh da ki Mask, ki Hand Sanitizer cha kiwa duna hei doh i pran wei hadien wa kut ka yalang da pynman leh yaka Free Medical Check Up.
