U Dr. A. War, Director Health Services (MI), da pyntip u wa hadooh ynne ka sngi, ka chnat yong oo da ye ko wow e dawai yada COVID-19 ya ki wakreh ka chnat i chait i khiah hadooh 7600 ngut kiwa kynthup lang leh ya kitu kiwa kreh ha ki thaw e sumaar yong ki bru samen wei lada khieñ lang kiwa emkaam wow e dawai da kynjoh ki ym duna ya 33,185 ngut.
I e dawai katkam wa pyntip u Dr. War wa da ye u pyndep ym duna ko ya ka 23%.
Hawa yaklam wa ki laad pathai khubor ynne ka sngi, u Dr. War da kwah u wow ong ya kani ka wi ka khubor wa kattæ neiliang yong ka sokar bei da e sñiawbha ko ya i dawai wei da booh ko leh yaki kyndon wa emkaam wow leh chwa wow e Inject ya kiwa kreh ha i chait i khiah neibhah wa toh ki kiwa em hakhmat wow toor chakhmat cha kiwa yoh ya u COVID-19.
Chooh chooh u Dr. War da pyntip u wa neiliang ka sorkar bei da e sñiawbha ko ya kamwa 35 hajar sien (Dose) i e dawai Inject, iwa katni daw ye u e dawai ya kamwa 16,000 ngut ki wakreh hei chait i khiah wei ini mut wa da ye wow yada wei wow kdoh u khoom yei poor u khñiang.
U Dr. War da pyntip u leh wa da yoh sñiaw wei da chem leh ya ki khubor hamsaya wa da pynhær chaphang i dawai yada heiwa da ong u wa ini ym toh iwa sakhiat wow ong wa ki em yei kynja jait kjut kiwa mih manda dep e dawai Inject, tangwa neiliang u Dr. War da kyntu u ya waroh wow ieh ki chadien ya kam kini ki khubor hamsaya wei wow chim ya ka kabu ksiar kawa da wan hakhmat deiwa chah sñiawbha da i yong ki hi mon wow chim ya ini i dawai.
