U General Secretary ka HYC War Jaiñtia Circle, u Tohmon Diam Mukhim uwa man leh kam uwi uwa da dep chim yei tika yada na u COVID-19, da ong u wa ym em chah ktah i doh i pran yong oo hadien wa yoh tika, deiwa pynchlur leh ya kiwi nadooh kiwa dang khynroo hadooh kiwa da tymmen wow wan ki chakhmat wow chim yei tika.
Da khut u leh wow ya krehlang wa ka sorkar neibhah kani ka kjut da pynjinjar pynsaja ko ya i nadooh ynnin u snem hadooh wym tipsap de kammon wow lai khih lai kreh, kammon u leh ha ka puræ puthi kawa da pyndooh nong lut ya waroh ha waroh ki liang iwa ym ye de wow mylliñ.
Da kyrmen skem u wa ini i dawai wa da paan da kyrpaad na u Blai wow e u ya ki Doctor wa ki Scientist ki laad ki luti kammon wow pyndam wei wow pyndooh ya kani ka kjut heiwa u Blai da jubab u yeini, kamtæ toh u pynemkaam hok ya ka deiwa wan tista wow chim ya ini i tika ha ki thaw sumaar ha em ha ki chnong lane chajan chnong.
Da kyntu u ya waroh wow chimkhia ya ini yow lait na i chitom i saja yow lait nei tieñ wei na i jinjar.
