U MLA ka Jowai, u Wailadmiki Shylla ynnin ka sngi da pynchlur u ya kiwa kitkaam wa ki dkhot ka Jaiñtia Body Building & Fitness Association (JBBFA) wow pteiñ ya ki kaam yong ka heipor wa lai pait u ya ka Body Mass & Fitness Gym kawa em ha Panaliar, Jowai.
Ya kani ka Gym kawa man kawi na ki thaw esikai wa ka thaw yalehke pynjra doh toh kawa da pynlai da ka JBBFA wei da sdang ya ka nadooh u snem 2011-12.
Neiliang u President ka Association, u Yoosar Kynjing da khana u ya i parom wa da lai ka seiñ heiwa ya kani ka Gym da chna dei yarap ki dkhot yong ka kamjooh leh ki lok ki jor.
Da pyntip u leh wa hajrong i dooh wei wym em wa yarap poisa neiliang ka JBBFA da pynman ko ya ki yakob pynyoo dohksah, ki esikai yonglang (Coaching) heiwa da wan ki bru chemphang ha kani ka kaam na Shillong wa kiwi kiwi.
Chooh chooh da pyntip u leh wa katni em kamwa palat 40 ngut kiwa wan yalehke heini wei ha ki snem wa dadep da jooh em kiwa yachim bynta wei kiwa da jop ha ki yakob wa pynman ha Jowai wa ha Shillong.
Heijooh i por da ong u wa ha kani ka thaw ka bai esikai (Fees) man ko du T. 300 chi bnai heiwa ye leh u ong wa man ko kawi na kiwa khian dooh hapoh jylla wei i daw wa khroo dooh toh wow pynchlur ya ki khynnah ha ki kaam yalehke khnang wow lait ki u ngat ha ki kaam wa sih ha ka juk wa katni.
Neiliang u Wailad da e yaroh u ya ka seiñ wei da pynchlur u leh ya ka wow pteiñ ko ya ki kaam wa leh ko.
Da kular u leh wa ha ki snem wow wan daw e yarap u cha ka JBBFA neibynta wow pynjanai wei wow pynbiang ya i emkaam ka thaw sikai wa pynlai ka seiñ.
Ha kani ka sngi da emlang u B. Sumer uwa man kam u General Secretary ka seiñ, u L. Sungoh kam u Finance Secretary ka seiñ wa kiwi kiwi.
