Ka Nartiang Modop Coordinate Committee (NMCC) hadien wa ka sorkar lyngba ka chnat puræ puthi ym mano ko wow chna pynmiat ya i bynta wa da sih yong ka skur Nartiang Pohchnong Govt. LP School, ynne ka sngi kani ka Committee da chimkti ko wow chna pynmiat hi pyn daka ya i bynta wa da sih yong kani ka yung skur.
Ka NMCC da ong ko wa da lai yachem wei da e dorkhat ko da boonsien ha ka chnat wow dawa chna pynmiat ya kani ka yung skur tangwa hadooh kini ki sngi wa dadep ym em wa mano wow ap yeini waroh.
Ynne ka sngi ka NMCC da chna pynmiat ko ya i chram wa da piah da slem bha wei ka Committee da ong ko wa daw pteiñ ko wow kreh hei wow chna pynmiat biang ya ka skur heiwa daw kylliang leh ya ki tin sap-yung (CGI Sheet) wei wow chna jar jiar ki kamra Class wei wow pynbiang ya ki chuki ki miej wa kiwi kiwi.
Neiliang u Secretary ka Committee, u HW Sutong da ekhublei wei da sñiawngooh u ya waroh kiwa kitkaam wa ki dkhot ka NMCC kiwa da chimkhai wow pynlait por ha kani ka sngi wow kreh neibynta ka skur wei khamtam wa da smat ki u e yarap sñiawbha ya kani ka skur.
Ka Committee da beiñ ko leh ya ka sorkar kawa da thlah wow leh ya kiwon kiwon ki kaam kiwa yatoh wa ki paidbah heiwa da rai ko leh wow chna wei wow pynmiat ya kani ka skur khlem yang ya ka sorkar neibhah wa kamwa man katni ki paidbah da sdang ki wow chaniah ya ka Committee bar ya ka sorkar MDA wa ka chnat puræ puthi.
