Ka sorkar Meghalaya chirup wa ka MyMeG kam chibynta wow wanrah yei synchaar wa khooid wei wow pynchlur i yakrehlang chirup yow pynman ya ki kaam pynroi wa lai bait, da pynman ko ya i lehkmen ‘Azadi Ka Amrit Mahotsav’ heiwa da chna pynwandur yei rwai laitlooid ka ri deiwa pynemkaam da ki tiar tem tynre namo ka Indigenous Version of the National Anthem.
Ya ini i sur da chna khnang wow wanrah yei sñiaw chngaaiñ wei sñiawskem ha ki paidbah ka Meghalaya wow man ko kam ka jylla kawa miat wa bha la myntu hadooh mynried mankawi.
Ya ini i sur da pynwandur da ki tre jylla deiwa pynemkaam ya ki tiar put tiar tem ka jylla. Nadooh wa sdang tem ha ka sngi chwa u dap 75 snem ka ri, ini i rwai da pynka’it i ya kiwa boon khamtam ha ki Social Media. Ini i Video yong i sur da pynyoo ya ki kaam pynroi hapoh ka jylla wei da khana leh ha kawon ka kyrdan em ka jylla.
I Video yong ini i rwai da kdaw leh ya u Montri Rangbah ka jylla, u Conrad K. Sangma chirup wa kiwi tawon na kylleiñ ka jylla. Ka jylla ha ki san snem wa da lai da sdang ko ya 41,000 tam ki Self-help Groups ki wow yarap ya ki kynthai ki wow kyntu kynrong ya i yoh i laa ka jylla. Heiyatoh wa ki kynthai wa pun-khon, ka sorkar da chna ko ya ki 80 tylli ki Transit Homes yow sah ki, wei da booh ko sa 150 tylli ki kari wow yarap kit ya ki cha ki thaw sumaar bru manda toh i por kha khon.
Ha i Video da klam leh hajrong ka Megha Health Insurance Scheme (MHIS) kawa e yarap T. 5 lak kawi ka manyung heiwa da kynjoh leh cha ki 4.7 lak ki manyung hapoh kani ka Scheme.
Da kdaw leh hajrong ka FOCUS kawa yarap T. 5,000 samen cha ki dkhot ki Farmers Groups namo ka seiñ ki warep ha ka jylla. Kiwi ki Scheme wa da kynthup ha i Video toh ka T. 1600 klur neibynta ki kaam uiñke suwari, ki 185 tylli ki Collective Marketing Centers; wow pynyabi ya ki yaw, i puræ puthi, i chna 2 km u sarok chi sngi ha ki thaw palatsor, wow pynyabi ya ka Shillong wa ki 8 tylli ki sor ka ri India kamjooh leh 250 tam ki lieñsuin chi tayaw.
Ya ini i Video da chna pynwandur da u Meban Lyngdoh wa u Ribor Mb, katwa kiwa chna ya i sur kynthup i ya u Benedict Hynniewta (Chawiang), Mebanlamphang Lyngdoh (Duitara) da pynemkaam leh ya ka Ksiñ Chynrang, ka Bom, ka Kynchew, Dymphong, Mieng Pioustian Marak (Dama) wa Chigring.
Ya ini i Video ye phi u pait heini ha wah:
